Níl an deis á tapú ag World Rugby
Má tá uair an chloig d’am saor agat agus má shocraíonn tú féachaint ar na buaicphointí ó chluiche a chaill tú i gCorn an Domhain, beidh díomá ort faoin méid a aimsíonn tú.
Cé go bhfuil an comórtas is mó sa rugbaí á imirt faoi láthair, tá sé socraithe ag World Rugby go mbeidh sé chomh deacair agus is féidir do dhaoine féachaint ar bhuaicphointí, ábhar a roinnt, nó cuidiú leis an gcluiche a chur chun cinn.
Sa sampla is déanaí, roinn Wayne Barnes, an réiteoir is mó taithí sa spórt faoi láthair, gearrthóg ar na meáin shóisialta de féin ag croitheadh lámh imreora tar éis dó carta buí a bhronnadh air. Bhain World Rugby an físeán seo anuas de bharr sárú cóipchirt. Chun sin a shoiléiriú, roinn Wayne Barnes físeán de féin. Cén chaoi a bhfuil World Rugby ag súil go gcothófar níos mó suime sa spórt i measc an phobail nuair a thógtar anuas físeáin atá roinnte ag a bhfostaithe féin? Ní dhéanann sé ciall ar bith.
Chonaic muid cad is féidir leis na meáin shóisialta a dhéanamh chun cabhrú le spórt a chur chun cinn. Cruthaíonn an NFL, an NBA, agus F1 ábhar do lucht leanúna atá ar fáil le féachaint air, idir chluichí agus rásaí gach aon seachtain. Tá Netflix ina chuid mhór den fhás ar F1 le déanaí ach ní hé sin an cheist anseo. Is í an cheist ná go bhfuil lucht leanúna rugbaí ag iarraidh féachaint ar rugbaí agus ba cheart do World Rugby Rugbaí a dhícheall a dhéanamh chun a chinntiú go bhfuil na gearrthóga is spreagúla de Chorn an Domhain á gcur amach ar na meáin shóisialta. Ach is é a mhalairt atá á dhéanamh acu.
Ní chosaíonn sé a dtáirge nuair a bhaintear físeáin ó X agus ó shuíomhanna meán sóisialta eile. Níl sé ag déanamh a dtáirge níos eisiaiche agus ní chruthaíonn sé éileamh i measc an phobail. Nuair a roinntear físeán de phíosa scile nó greamú iontach, is é sin a tharraingíonn an pobal chuig an spórt. Is é an rud a thugann orthu aird a thabhairt air. Is cuma le daoine nach mbreathnaíonn ar rugbaí faoi dhlíthe an chluiche nó faoi cad ba cheart a bheith ag tarlú. Go leor den am, níl uathu ach rud éigin spreagúil a fheiceáil. Ach cé go bhfuil na rudaí corraitheacha seo ag tarlú ar an bpáirc (smaoinigh ar shíneadh amach na Portaingéile i gcoinne na Breataine Bige), tá World Rugby sásta iad a cheilt ina n-oifigí ar ríleanna nach bhfeicfidh éinne go deo.
Beidh na cluichí is mó i gCorn an Domhain ann go luath. Tá cuid acu – amhail an Fhrainc i gcoinne na Nua-Shéalainne nó an Afraic Theas i gcoinne na hÉireann – tar éis tarlú cheana féin; tá an seans chun na cluichí seo a chur chun cinn thart agus níl aon rud is féidir linn a dhéanamh faoi sin anois. Ach do na cluichí atá le teacht, ba chóir go mbeadh World Rugbaí ag dul as a mbealach chun ábhar a chruthú chun aird lucht leanúna nua a tharraingt. Más rud é nach bhfuil siad ag iarraidh é sin a dhéanamh, cén fáth nach ligfidís do líon áirithe anailísithe rugbaí a gcuid ábhar féin a chruthú lena roinnt? Is cinnte go mbeadh formhór den ábhar seo an-dearfach agus ní chosnódh sé pingin rua ar an eagraíocht.
Ní mór an rugbaí a chur chun cinn ionas go mbeidh seans aige dul san iomaíocht le spóirt atá níos mó. Mura bhfuil tú chun é a dhéanamh le linn an chomórtais is mó sa spórt, cathain atá tú chun é a dhéanamh?
The post Níl an deis á tapú ag World Rugby appeared first on NÓS.
