Colúnaí NÓS, Aedín Ní Thiarnaigh, i measc na mbuaiteoirí ag Gradaim Chumarsáide an Oireachtais
Tugadh aitheantas do dhuine de scríbhneoirí NÓS ag Gradaim Chumarsáide an Oireachtais i gCill Airne aréir agus an gradam ‘Colúnaí na Bliana’ bronnta ar Aedín Ní Thiarnaigh.
Tá Aedín, arb as Loch Garman ó thús di ach atá anois ag cur fúthu ar Inis Meáin, ag scríobh do NÓS le tamall de bhlianta agus is féidir a cuid alt don iris a léamh anseo.
I measc na scríbhneoirí eile a bhí ar an ghearrliosta in éineacht léi sa rannóg bhí Sláine Ní Chathalláin, colúnaí eile de chuid na hirise seo a bhfuil a hailt faoi charachtair Chocra Dhuibhne tar éis dul i bhfeidhm ar go leor.
Is í an t-iar-NÓSadóir agus iriseoir le Tuairisc.ie, Méabh Ní Thuathaláin, a thóg léi an gradam ‘Iriseoir na Bliana’.
Beirt bhan chumasacha eile a bhuaigh na gradaim ‘Pearsa Raidió na Bliana’ agus ‘Pearsa Teilifíse na Bliana’, mar atá Neansaí Ní Choisdealbha ó RnaG agus Sinéad Ní Uallacháin, a bhí ainmnithe as an tsraith Beidh mé ar ais ar TG4.
Is ar an iriseoir agus craoltóir ildánach Eoghan Ó Néill as Béal Feirste a bronnadh ceann de mhórghradaim na hoíche, Buaic-Ghradam Cumarsáide an Oireachtais. Bhí Eoghan ar na daoine a bhunaigh an staisiún raidió Raidió Fáilte agus an nuachtán Lá, agus is fathach de chuid na hiriseoireachta Gaeilge é le blianta fada anuas.
Is ó thuaidh atá dhá dhuais eile ag dul lena chois mar gur bronnadh gradam speisialta ar chlár Gaeilge BBC Raidió Uladh, Blas, atá 25 bliana ar an fhód i mbliana, agus bhuaigh Séamus Mac Murchaidh: Díolta faoina Luach, a léirigh Macha Media, ‘Clár Teilifíse na Bliana’.
Is é an saothar gleoite Róise & Frank, ina bhfuil Bríd Ní Neachtain sa phríomhról agus a léirigh Macalla Teo, a bhuaigh ‘Scannán na Bliana’.
Colm Mac Giolla Easbuic – a bhíonn ag obair le RnaG agus le feiceáil ar Ros na Rún – a thóg leis an gradam ‘Réalta Óg na Bliana’, a raibh Eagarthóir nua NÓS, Conor Torbóid, san iomaíocht dó chomh maith.
Bronnadh an gradam ‘Sraith Raidió na Bliana’ ar An Cúinne Dána, a láithríonn Tristan Rosenstock ar RnaG, agus is é an tráchtaire spóirt Brian Tyers a ainmníodh mar ‘Craoltóir Solabhartha na Bliana’.
Bláth na hÓige, sraith cheoil a rinne Aniar TV do TG4, a tháinig amach chun tosaigh sa rannóg ‘Sraith Teilifíse na Bliana’.
Comhghairdeas mór ó chroí le gach buaiteoir agus le gach duine a bhain áit amach ar ghearrliosta na bliana seo!
Tá liosta iomlán na mbuaiteoirí le fáil anseo thíos:
Colúnaí na Bliana
Aedín Ní Thiarnaigh – NÓS
Clár Teilifíse na Bliana
Séamus Mac Murchaidh: Díolta faoina Luach – Macha Media
Scannán na Bliana
Róise & Frank – Macalla Teo
Sraith Raidió na Bliana
An Cúinne Dána – RTÉ Raidió na Gaeltachta
Iriseoir na Bliana
Méabh Ní Thuathaláin – Tuairisc & 7Lá ar TG4
Pearsa Raidió na Bliana
Neansaí Ní Choisdealbha – RTÉ Raidió na Gaeltachta
Pearsa Teilifíse na Bliana
Sinéad Ní Uallacháin – Beidh mé ar ais
Clár Gaeilge na Bliana Ar Raidió Pobail
Filí Chonamara – Raidió Pobail Chonamara
Clár Gaeilge na Bliana Ar Raidió Tráchtála
Splanc le Cuán Ó Flatharta – Newstalk
Sraith Teilifíse na Bliana
Bláth na hÓige – Aniar TV
Gradam Speisialta
Blas – BBC Gaeilge
Craoltóir Solabhartha na Bliana
Brian Tyers – TG4
Réalta Óg na Bliana
Colm Mac Giolla Easbuic – Ros na Rún & RTÉ Raidió na Gaeltachta
Buaic-Ghradam Cumarsáide an Oireachtais
Eoghan Ó Néill
The post Colúnaí NÓS, Aedín Ní Thiarnaigh, i measc na mbuaiteoirí ag Gradaim Chumarsáide an Oireachtais appeared first on NÓS.
