Tá díomá léirithe ag Conradh na Gaeilge nár luadh cás na Gaeilge ná na Gaeltachta le linn na bpríomhóráidí ag Ard-Fheis Shinn Féin i mbliana.
Rinne Uachtarán Shinn Féin, Mary Lou McDonald, leasUachtarán an pháirtí Michelle O’Neill, agus an leascheannaire Pearse Doherty cur i láthair ag Ard-Fheis Shinn Féin 2023 i mBaile Átha Luain ag an deireadh seachtaine ach níor thagair duine ar bith acu do chás na Gaeilge ná na Gaeltachta le linn a gcuid cainte.
D’iarr Tuairisc ráiteas ar Shinn Féin maidir leis an easpa tagairtí don Ghaeilge agus don Ghaeltacht sna príomhóráidí ag Ard-Fheis an pháirtí ach níor tugadh aon fhreagra ar an iarratas go fóill.
Ina hóráid Dé Sathairn, bhí an ghéarchéim tithíochta, cúrsaí sláinte, an costas maireachtála, an t-athrú aeráide agus an Phalaistín i measc na n-ábhar ar labhair Mary Lou McDonald fúthu ach cé go ndearna sí píosaí cainte i nGaeilge, níor luaigh sí cás na teanga ná na Gaeltachta.
Is amhlaidh a bhí in óráid Pearse Doherty, a labhair i nGaeilge faoin obair a bhí déanta agus a bhí le déanamh ag Sinn Féin ach nach ndearna aon tagairt do chúrsaí teanga.
Dúirt Ard-Rúnaí Chonradh na Gaeilge, Julian de Spáinn, go raibh tacaíocht léirithe ag Sinn Féin don teanga roimhe seo ach gur “deis caillte” a bhí ann nár luaigh ceannairí an pháirtí tuilleadh tacaíochta a léiriú don teanga.
“Tá sé an-díomách nach raibh cás na Gaeilge nó na Gaeltachta san áireamh sna hóráidí poiblí sin. Deis caillte a bhí ann, deis an pobal a spreagadh ó thaobh na teanga agus na Gaeltachta,” a dúirt de Spáinn le Tuairisc.
“Mar sin féin, táimid mar eagraíocht buíoch de Shinn Féin as an tacaíocht atá léirithe acu do na feachtais éagsúla atá ar siúl againn — an Plean Fáis agus ceist na pleanála tithíochta sa Ghaeltacht, mar shampla.
“Tá tacaíocht láidir tugtha acu d’fheachtas Bhaile Átha Cliath 2,4,6,8, feachtas ar son gaelcholáiste don cheantar sin agus tá tacaíocht tugtha acu do chearta teanga agus don reachtaíocht teanga ó thuaidh. Léirigh líon na rún faoin nGaeilge agus faoin nGaeltacht agus ábhar na rún ag an Ard-Fheis an tacaíocht sin freisin. Ach deis caillte a bhí ann.”
Rinne Sinn Féin cáineadh ar an Rialtas nuair a fógraíodh Buiséad 2024 ag rá gur bhuiséad “frithGhaeltachta” a bhí ann toisc nach raibh níos mó airgid á chur ar fáil don Ghaeilge agus don Ghaeltacht.
€4 milliún breise a d’fhógair an Rialtas do chúrsaí teanga an bhliain seo chugainn ach bhí pacáiste €34 milliún breise molta ag Sinn Féin don teanga i mbuiséad malartach an pháirtí.
