Fathaigh, curiarrachtaí agus scáthdhornálaíocht: súil chun tosaigh ar CLG na bhfear in 2024
Bliain nua, agus cé go bhfuil sioc mhí Eanáir ag socrú isteach go ceann tamaill eile, tá deireadh an gheimhridh fhada romhainn agus bliain mhór spóirt i ndán dúinn in 2024.
Agus curiarracht ar an líne sa chraobh iománaíochta, fathaigh bhainistíochta in aghaidh a chéile sa pheil agus an gnáthscaoll morálta le brath i gcónaí, caithimis súil ar chuid den mhéid ar féidir a bheith ag súil leis thar an chéad 12 mhí eile.
Iomáint
San iománaíocht, níl sioc sin na hathbhliana ag cur isteach go dtí seo ar na comórtais réamhshéasúir. Cá bhfios cé mhéad atá á fhoghlaim ag na imreoirí i gCorn Bhreathnach (scríobhann cuid de na jócanna faoin urraitheoir, Dioralyte, iad féin) agus i Sraith na Mumhan, ach nach dtiocfadh an cheist chéanna a chur faoin tSraith Náisiúnta i gcás na liathróide bige le cúpla bliain anuas?
Ag deireadh na dála, is fíorbheagán a fhoghlaimeoimid faoin iomaíocht a bheidh os comhair Luimnigh agus iad ag tabhairt faoin chúigiú craobh a ghnóthú as a chéile den chéad uair riamh san iománaíocht – go dtí go dtabharfaidh siad cuairt ar Pháirc Uí Chíosóg an 21 Aibreán.
Tugann am seo na bliana deis, ar a laghad, do na foirne idirchontae atá ar imeall na scothaicme an bhearna sin a laghdú rud beag. Is fíorbheagán a bheidh foghlamtha ag Áth Cliath ná ag Aontroim, áfach, ón slad a rinneadh ar na Cróchbhuíonna i bPáirc Parnell i gCorn Bhreathnach – ach amháin go bhfuil an chuma air go mbeidh straitéis poc amach Aontroma marfach dóibh arís eile i mbliana.
Tá bliain mhór eile de dhíth ar Mhicheál Donoghue má tá sé chun Áth Cliath a thabhairt i dtreo na huasaicme sin, agus an baol ann go mbeidh streachailt i ndán d’Aontroim ina gcéad bhliain gan a gceannaire Neil McManus agus roinnt mhaith de dhream Dhún Leathaigh – coinneoimid súil ar na foirne sin idir seo agus deireadh na sraithe náisiúnta. Seachas sin – agus cluiche ceannais na gclub an deireadh seachtaine seo chugainn – feicfimid sibh ar ais anseo an 21 Aibreán.
Peil
Is mó a fhoghlaimeofar ón tSraith Náisiúnta peile, atá ag croílár aicsean na liathróide móire le blianta beaga anuas – agus giota beag níos mó airde uirthi i mbliana, b’fhéidir, le tuilleadh daoine le feiceáil ar an taobhlíne lena linn.
Díreach mar a bhí in 2011, tá Jim McGuinness tagtha i gceannas ar Dhún na nGall, foireann atá rud beag caillte, tráth a bhfuil Mickey Harte (thuas) ina bhainisteoir ar fhoireann atá ina seaimpíní in Ultaibh le dhá bhliain anuas. An t-am seo, áfach, is í Doire atá ar thairseach dul chun cinn mór agus iad ag cnagadh ar an doras uile-Éireann le cúpla bliain – tá Harte istigh chun an chéim sin a chur i gcrích leo mar a rinne sé ina chéad bhliain le Tír Eoghain in 2003. Beidh leathshúil ar a laghad ag an tír ar fad, mar sin, ar scáthdhornálaíocht an dá chontae i gcluiche ceannais Chorn an Dochtúra Mac Cionnaith an deireadh seachtaine seo chugainn.
In éineacht leis na tinrimh arda a tuairiscíodh ag cluichí an chomórtais chéanna an mhí seo, tagann an tsuim níos suntasaí sin sna comórtais réamhshéasúir rud beag salach ar phríomhghné de dhioschúrsa na peile le blianta beaga anuas: is é sin go bhfuil an spórt féin ar an dé deiridh toisc ró-chóitseáil; róbhéim ar an aclaíocht seachas ar an imirt; pasanna lámha seachas cicphasáil; easpa spontáineachta na n-imreoirí; pluid-chosaint; formáid chiotach The Sunday Game; rath na foirne náisiúnta rugbaí; ceartaiseacht pholaitiúil; agus cibé rud eile a bheidh agatsa féin leis.
Lom dáiríre, is deacair an argóint a dhéanamh go bhfuil an pheil anois chomh tarraingteach céanna mar thaispeántas is a bhí sular tháinig réabhlóid theaicticiúil McGuinness in 2011. Má tá an pheil le sábháil uaithi féin – nó mura mbeidh beart rialacha nua chun amhlaidh a dhéanamh – seans go mbeidh réabhlóid eile de dhíth ó dhuine de na fathaigh bhainistíochta seo in 2024 chun sciúirse na stíle seilbh-bhunaithe a ruaigeadh ar deireadh.
Níor luaigh muid fiú an t-ocras a bheidh ar David Clifford cuimhní an chluiche ceannais anuraidh a chur i gceart, ná imreoirí Átha Cliath atá i ndiaidh éirí as an pheil ar deireadh. Nach cuma faoin pheil mar thaispeántas nuair atá an scéalaíocht mórthimpeall uirthi chomh maith sin?
The post Fathaigh, curiarrachtaí agus scáthdhornálaíocht: súil chun tosaigh ar CLG na bhfear in 2024 appeared first on NÓS.
