Jeffrey Donaldson caithréimeach, tacaíocht a pháirtí aige chun éirí as an mbaghcat ar Stormont ach údar imní is ea an ‘cúigiú colún’ san DUP.
Ní haon ribín réidh an cúrsa atá roimh cheannaire an DUP agus feidhmeannas Stormont féin.
Faoiseamh dá lán ab ea fógra cheannaire an DUP do na meáin ag a haon a chlog maidin Dé Máirt go raibh tacaíocht chomhairle feidhmiúcháin an pháirtí faighte aige chun filleadh ar roinnt na cumhachta in Stormont.
Bhí an ceann is fearr faighte ag Jeffrey Donaldson ar na heasaontóirí laistigh agus lasmuigh dá pháirtí. Éacht ab ea é sin i bhfianaise an dráma, nó scigdhráma, a bhain le cruinniú an pháirtí.
Bhí an t-ionad le haghaidh teacht le chéile an bhreis is 120 comhalta den chomhairle in ainm is a bheith príobháideach ach sceitheadh an t-eolas chuig feachtasóirí atá in aghaidh athbhunú Stormont gan an teorainn i Muir Éireann a bheith curtha ar ceal. Bhí leathchéad lucht agóide ansin roimh na toscairí ag agairt orthu ‘feall’ agus ‘cúlú’ a chosc.
Níos measa fós bhí an blagaire dílseach, Jamie Bryson, ag tvuíteáil cuntas ar an gcruinniú fad is a bhí sé ag tarlú. Cheap daoine ag an gcruinniú gur duine éigin a bhí i láthair a thug rochtain ar ghuthán do Bryson. Feall a thug Donaldson air sin. Maíodh níos deireanaí gur bugáilte a bhí na himeachtaí.
Mhair an cruinniú cúig uaire an chloig agus ceistíodh Donaldson go dian. Dúirt an ceannaire gur thacaigh móramh den pháirtí leis ach níor foilsíodh toradh an vóta. Tá a fhios go bhfuil Nigel Dodds, Sammy Wilson agus Ian Paisley in éadan an mhargaidh chomh maith le dornán de na Teachtaí Tionóil ach ba ag na daoine a chreideann gurb é leas an phobail agus neartú an Tuaiscirt sa Ríocht Aontaithe é Stormont a bheith ag feidhmiú a bhí an svae.
Níor tugadh le fios don phobal cé na téarmaí a réitíodh idir an DUP agus rialtas na Breataine, ach i bhfianaise chomh minic is a rinne an Bhreatain feall orthu cheana bhí ceannaire an DUP diongbháilte nach nglacfadh sé le muc i mála.
Bhogfadh an DUP nuair a bheadh coinníollacha comhlíonta ag rialtas na Breataine. Thug an Státrúnaí Chris Heaton-Harris le fios go bhfoilseofar páipéar ceannais an rialtais De Céadaoin agus go rithfear reachtaíocht – ordú i gcomhairle, seachas bille – Déardaoin. D’fhágfadh sin go mb’fhéidir go mbeadh cruinniú Tionóil ann De hAoine nó Dé Sathairn.
Chuir an Státrúnaí na páirtithe eile atá i dteideal a bheith sa bhFeidhmeannas in Stormont ar an eolas faoi rún faoin margadh. Bhíodar sásta nach raibh rud ar bith ann a thiocfadh salach ar Chomhaontú Aoine an Chéasta. Níor thug siadsan aon leide go raibh Creat Windsor/an Prótacal iar-Bhreatimeachta cealaithe.
Dúirt Jeffrey Donaldson inniu, Dé Máirt, go mbeadh deireadh scun scan le seiceáil nó dearbhú custaim ar earraí ón mBreatain Mhór a bheadh le húsáid i dTuaisceart Éireann. Athrú suntasach é sin, más fíor. Nó fadhb mhór do Jeffrey más snas ar an margadh é.
Beidh a naimhde – Jim Allister an TUV, an blagaire Bryson agus na daoine eile a bhí in éindí le ceannaire an DUP ar léirsithe in éadan an phrótacail agus Chreat Windsor – ar a ndícheall ag iarraidh tuisle a bhaint as.
Tá siad ag rá gur chlis Donaldson ar a fhocal agus ní ligfidh siad deis ar bith tharstu chun iarracht a dhéanamh é a chur dá bhonn. Ina theannta sin. tá ‘umhlú do Chéad-Aire ó Shinn Féin’ á chaitheamh mar achasán ag roinnt cheana féin. Lá stairiúil do náisiúnaithe a bheas ann Michelle O’Neill a bheith sa chéad-aireacht, ach beidh obair dhúshlánach le déanamh ag Feidhmeannas nua chun fóint ar an bpobal agus chun muinín sa pholaitíocht réigiúnach a chothú.
