D’fhéadfadh go gcaillfidh daltaí i scoileanna lán-Ghaeilge amach ar thacaíocht riachtanach bhreise faoi chóras nua atá á thabhairt isteach ag an Roinn Oideachais.
Deir an eagraíocht Gaeloideachas go ndéanfaidh an córas nua atá á thabhairt isteach do Mhúinteoirí Oideachais Speisialta “éagóir” ar scoileanna lán-Ghaeilge.
Údar imní go háirithe don eagraíocht an múnla a úsáidfear chun a shocrú cad iad na huaireanta tacaíochta a bheidh ar fáil don Ghaeilge agus don Bhéarla sna scoileanna lán-Ghaeilge.
Faoin gcóras nua leagtar an-bhéim ar leibhéal na litearthachta agus na huimhearthachta i scoileanna agus uaireanta tacaíochta á ndáileadh.
Deir Gaeloideachas go bhfuil an cur chuige sin i bhfad ‘róchúng’ agus go mbeidh “impleachtaí tromchúiseacha” aige do scoileanna lán-Ghaeilge agus Gaeltachta agus do dháileadh “cothrom” uaireanta teagaisc.
De réir chiorclán nua na Roinne, beidh 68.5% de na huaireanta tacaíochta a bheidh ar fáil á ndáileadh bunaithe ar litearthacht agus uimhearthacht sna scoileanna.
Ach i gcás na litrearthachta sna scoileanna lán-Ghaeilge, is iad na meánthorthaí ó scrúduithe caighdeánacha sa Bhéarla agus sa Ghaeilge a úsáidfear chun líon na n-uaireanta tacaíochta a bheidh ar fáil dóibh a mheas.
Mar sin, a deir Gaeloideachas, in áit freastal ar na riachtanais ar leith atá ag an dalta sa dá theanga, beidh a chuid riachtanas á meas bunaithe ar an meántoradh a fhaigheann sé sa dá theanga.
Deir Gaeloideachais go gciallóidh sé sin go bhféadfadh scoileanna lán-Ghaeilge uaireanta teagaisc a chailliúint agus go gceilfí ar dhaltaí sna scoileanna sin tacaíocht atá riachtanach.
Tá soiléiriú á lorg ag Gaeloideachas ón Roinn Oideachais faoin “réasúnaíocht” a bhaineann leis an gcur chuige nua agus faoin “bunús eolaíoch” atá leis an múnla nua.
Deir siad nár chuathas i gcomhairle mar ba chuí le scoileanna lán-Ghaeilge agus Gaeltachta sular eisíodh an ciorclán.
Déanfar “leithcheal” ar pháistí sa chóras lán-Ghaeilge mura dtabharfar aghaidh go “cothrom” ar riachtanais na ndaltaí sa dá theanga.
“Sna scoileanna meán-Bhéarla, níl dualgas ann torthaí na dtástálacha caighdeánaithe sa Ghaeilge a thuairisciú don Roinn, ná fiú tabhairt faoi na scrúduithe sin.
“Níl cothromaíocht ann ar an gceist seo, leis an dualgas breise a bheidh ar na scoileanna lán-Ghaeilge, agus an ganntanas tacaíochta teanga freisin.
“Beidh impleachtaí chur i bhfeidhm an chiorcláin seo soiléir láithreach do roinnt scoileanna, a bheidh ag cailliúint uaireanta, ach beidh an toradh praiticiúil níos soiléire arís do scoileanna eile amach anseo,” a dúradh i ráiteas ó Gaeloideachas.
