Casfaidh an fhoireann is fearr sa chomórtas go dtí seo ar an gceann a bhfuil daoine bréan de bheith ag breathnú orthu i München anocht agus an Spáinn agus an Fhrainc ag imirt i gcoinne a chéile sa chéad chluiche leathcheannais ag EURO 2024.
Tháinig na Spáinnigh slán ó chluiche taitneamhach i gcoinne na Gearmáine sna babhtaí ceathrú ceannais nuair a thug cúl Mikel Moreno sa nóiméad deireanach d’am breise an bua dóibh, 2-1.
Bhí Niko Williams agus Yamine Lamal ar fheabhas arís don Spáinn agus is beag nár íoc an bainisteoir Luis de la Fuente go daor as an gcinneadh an bheirt a bhaint den pháirc sa dara leath den chluiche.
Níl ach ceithre chúl san iomlán scóráilte sna cúig chluiche a d’imir an Fhrainc go dtí seo sa Ghearmáin. Ciceanna éirice a bhí i bpéire acu siúd, ceann a scóráil an Fhrainc agus ceann eile a ghéill siad, agus cúil tuathail a bhí sa phéire eile.
Nuair a chuirtear san áireamh caighdeán na n-imreoirí a bhí ar an bpáirc, bhí an cluiche idir an Fhrainc agus an Phortaingéil sna babhtaí ceathrú ceannais ar cheann de na cluichí ba mheasa a bhí againn go dtí seo sa chomórtas.
Is ar éigean a chruthaigh na foirne deis mhaith ar bith sa chluiche agus an Fhrainc ag brath go mór ar an ngearradh a thug Ousmane Dembélé dóibh nuair a tugadh isteach mar ionadaí é sa dara leath.
Ní dheachaigh Kylian Mbappé i bhfeidhm ar an gcluiche ar chor ar bith agus ba léir go raibh a shrón, a briseadh sa chéad chluiche ag an bhFrainc, fós ag cur as go mór dó agus é bainte den pháirc san am breise.
Beidh na Francaigh ag súil nach mbeidh an phian ag cur isteach chomh mór céanna air anocht, go háirithe nuair atá fadhbanna dá gcuid féin ag an Spáinn,
Beidh ar Luis de la Fuente taobh na láimhe deise den chosaint a athrú go hiomlán agus an cosantóir láir Robin Le Normand agus an lánchúlaí Dani Carvajal ar fionraí.
Tiocfaidh Nacho Fernandez isteach sa lár agus d’fhéadfaí Jesus Navas a fheiceáil ar thaobh na láimhe deise. Tá Navas 38 bliain d’aois, áfach, agus nuair nach bhfaighidh sé an oiread sin cúnaimh ó Yamine Lamal ar an gcliathán céanna, d’fhéadfadh Navas a bheith fágtha gan chosaint i gcoinne Mbappé. Rogha eile atá ag an Spáinn ná Marc Cucurella a bhogadh trasna ón gcliathán clé.
Beidh athrú eile de dhíth i lár na páirce agus Pedri gortaithe ach bhí Dani Olmo ar fheabhas nuair a tháinig sé isteach i gcoinne na Gearmáine agus níor chóir go gcuirfeadh an t-athrú sin isteach rómhór ar na Spáinnigh.
Beidh Adrien Rabiot ar fáil anocht don Fhrainc tar éis dó an cluiche i gcoinne na Portaingéile a chailliúint agus d’fhéadfadh Deschamps é a chaitheamh isteach arís chun an imirt idir an chosaint agus na tosaithe a nascadh le chéile.
Shamhlófá nach gcuirfidh sé isteach beag ná mór ar Deschamps má bhíonn cluiche na hoíche anocht chomh dona céanna is a bhí cinn eile na Fraince go dtí seo sa chomórtas chomh fada is go n-éiríonn leo teacht slán.
Is ag na Spáinnigh atá an fuinneamh, an chruthaitheacht agus an gearradh ach is ag an bhFrainc atá an taithí agus go minic ag na mórchomórtais, is í sin is tábhachtaí.
