Tá sprioc-am nua curtha ag Michel Barnier,príomh-idirbheartaí an Aontais Eorpaigh leis na cainteanna Breatimeachta agus rabhadh tugtha aige nach leanfar leis na cainteanna i ndiaidh na Céadaoine.
Ag seisiún eolais do na Feisirí Eorpacha agus ambasadóirí an AE sa Bhruiséil, dúirt Barnier go raibh na cainteanna “an-ghar don chor deiridh” agus go rabhthas ag súil leanúint leis an idirbheartaíocht go dtí lár na seachtaine seo ach gurbh é sin a ndeireadh.
Dúirt an Taoiseach Micheál Martin gur ‘teip shuntasach’ a bheadh ann mura dtiocfaí ar mhargadh agus “go gcuirfeadh sé as gan ghá” don gheilleagar i dtíortha éagsúla.
Dúirt an tAire Gnóthaí Eachtracha Simon Coveney go raibh an scéala ó Michel Barnier “an-éadóchasach”.
“Déarfainn go bhfuil sé sách éadóchasach, agus ar ndóigh tá sé an-cháiréiseach faoina gcumas dul chun cinn a dhéanamh inniu,” a dúirt Coveney.
Chuir Michel Barnier fainic ar an Ríocht Aontaithe nach nglacfadh na ballstáit le haon mhargadh dá n-achtódh an Ríocht Aontaithe Bille an Mhargaidh Inmheánaigh agus an Bille Airgeadais.
Sháródh an reachtaíocht sin atá i gceist ag an mBreatain a thabhairt isteach an Comhaontú Aistarraingthe.
An iomaíocht chóir a chosaint, cead iascaigh ag iascairí an Aontais Eorpaigh i bhfarraige na Breataine, agus córas réitigh aighneas sa gcás go sárófaí an conradh, na hábhair is achrannaí san idirbheartaíocht.
An Déardaoin a thiocfaidh ceannairí an AE le chéile chun vótáil ar chomhaontú nó tús a chur lena n-ullmhúcháin don Bhreatimeacht gan mhargadh. Chaithfí reachtaíocht shealadach a thabhairt isteach ionas go bhféadfaí aerthaisteal a choinneáil ag imeacht.
Beidh comhrá gutháin ag Ursula von der Leyen, Uachtarán an Choimisiúin Eorpaigh le Boris Johnson na Breataine inniu d’fhonn bealach éigin a fháil as an tsáinn.
Sa Bhruiséil inniu chomh maith beidh cruinniú ag an Aire Michael Gove le Maros Sefcovic, Leas-Uachtarán an Choimisiúin Eorpaigh, chun plé a dhéanamh ar impleachtaí an chonartha aistarraingthe agus na socruithe do Thuaisceart Éireann, socruithe a rinneadh ionas nach mbeadh aon teorainn chrua ar an oileán seo, bíodh margadh ann nó ná bíodh.
