Tá na céadta daoine ag léamh Scott Pilgrim as Gaeilge
Tá an tsraith úrscéalta grafacha Scott Pilgrim, ar bunaíodh an scannán ‘Scott Pilgrim vs. The World’ (2010) air, á foilsiú ag an chuideachta foilsitheoireachta, Gliadar. Cuideachta a chuireann “na leabhair is spleodraí” ar fáil í Gliadar ina bhfuil foireann dhíograiseach ag obair chun úrscéalta comhaimseartha a fhoilsiú trí mheán na Gaeilge.
Is sraith trí leabhar í Scott Pilgrim ina mbuaileann an fhantasaíocht, an grá, an greann agus an dráma le chéile. Scott Pilgrim is ainm don phríomhcharachtar, “fear óg leibideach” a bhfuil cónaí air in Toronto, Ceanada. Saol breá atá aige lena chailín, Knives Chau, go dtí go dtagann Ramona Flowers, bean nach fios cé hí, chuige ina chuid brionglóidí. Cé nach bhfuil aithne ag Scott uirthi, éiríonn leis bualadh léi agus lastar splanc eatarthu.
Is éigean dó Knives a chur ar leataobh chun croí Ramona a bhuachan. Níl Ramona gan fhadhbanna ach oiread óir tá iar-leannáin dá cuid in éad le Scott agus déanann siad a ndícheall caidreamh na beirte a mhilleadh. Trí chath agus cogadh amháin a bhainfidh Scott croí Ramona anois.
Foilsíodh na chéad imleabhair sa tsraith in 2004 le Bryan Lee O’Malley, a scríobh agus a dhear an na húrscéalta. D’éirigh leis an tsraith cultas bunaithe a ghnóthú idir 2004 agus 2010, agus bhí 1 milliún cóip i gcló faoin bhliain chéanna. Stiúir Edgar Wright an scannán mór le rá ‘Scott Pilgrim vs. The World’, a bunaíodh ar an tsraith úrscéalta agus a cuireadh amach in 2010.
Ghlac Michael Cera (Scott), Ellen Wong (Knives) agus Mary Elizabeth Winstead (Ramona) na príomhpáirteanna sa scannán. Rinne an cóiriú scannáin ar na leabhair clú Scott Pilgrim a mhéadú ar fud an domhain agus tháinig na haisteoirí ar ais in 2023 lena nglór a thabhairt don chlár anime ‘Scott Pilgrim Takes Off’, atá bunaithe ar an scéal chéanna.
Tá an tsraith leabhar spleodrach anois le fáil go hiomlán i nGaeilge a bhuí le Gliadar. Rinne Katelyn McKenna, ealaíontóir ó na Clocha Liatha i gCill Mhantáin, athdhearadh ar na focail ar fad atá le feiceáil sna grafaicí. Deir Gliadar go bhfuil “na leabhair ag cur thar maoil le híomhánna Gaeilge agus tumtar an léitheoir i dtimpeallacht lán-Ghaeilge.”
Díoladh an chéad 100 tacar leabhar go han-tapa agus tá Gliadar ag déanamh iarracht freastal ar an éileamh dhochreidte atá ar na leabhair as Gaeilge. Is féidir an tsraith iomlán a réamhordú ag gliadar.ie agus tá fáil saor in aisce ar an chéad chaibidil freisin.
The post Tá na céadta daoine ag léamh Scott Pilgrim as Gaeilge appeared first on NÓS.
