‘D’fhéadfainn breathnú air seo ar feadh an lae’

Bhí an léirmheas seo deacair. B’fhéidir an léirmheas ba dheacra a bhí agam le scríobh riamh.

Tá cúpla fáth leis seo: ní féidir liom aon sonraí den scéal a roinnt; is duine de lucht leanúna Marvel mé, agus mar sin caithfidh mé a bheith chomh réchúiseach agus is féidir; agus ag trí huaire an chloig ar fad agus é ag cur críoch le 22 scannán, ceann acu siúd a bhí mar cheann de na scannáin is mó ar domhan (Avengers: Infinity War), tá sé ar nós léirmheas a scríobh ar eachtra stairiúil seachas ar scannán amháin. 

Déanfaidh mé mo dhícheall a bheith chomh doiléir maidir les an scéal agus is féidir liom, mar sin má tá tú ag iarradh eolas cruinn, beacht faoin scannán, léigh léirmheas eile. 

Breathnaigh. Tá an scannán seo an-mhaith. Tá sé an an-mhaith. Tá sé barrúil, tá sé brónach, tá an aisteoireacht thar cionn, go háirithe Chris Evans, Chris Hemsworth agus Robert Downey Jr. — an triúir a thosaigh an tsraith. Is deireadh sásúil é do dhaoine atá ag leanúint na scannán seo ó 2008 i leith agus níos mó ná uair nó dhó d’airigh mé na deora i mo shúile.

 Agus bhí neart amanna ann freisin a bhéic mé le gliondar i mo chroí ar nós páiste ag breathnú ar chartún. Bhain mé an oiread taitneamh as an scannán seo, gur chuma liom go raibh orm uisce a shéanadh ar feadh an lae roimh ré mar gheall go raibh faitíos orm go mbeadh orm dul ag an leithreas leath bealaigh tríd.

Mar sin féin — níl sé gan locht, ná baol air. Airím go raibh an féinmholadh iomarcach go minic, agus bhí radhairc ann i ndáiríre, a chuireadh fonn múisc ar dhuine mar gheall ar na na nodanna ar fad a bhí ann díreach don lucht leanúna. Tháinig na radhairc seo gar go deireadh an scannáin áit a thit an scannán síos ar aon nós — pléascanna móra liatha agus an oiread ag tarlú ar an scáileán gur chuir sé mearbhall orm. 

Nuair a thagann an crú ar an tairne sa triú cuid, ligeadh na maide le sruth agus bíonn cath ollmhór ann atá feicthe againn míle agus céad uair. 

Ach ní hé sin le rá nach bhfuil an scannán seo speisialta. Mar tá. Is deacair an rud é scannán, eachtra, aon rud mar seo a thabhairt le chéile, agus níl sé déanta ag aon duine eile riamh cheana, agus tá saol na scannán athraithe go deo ag an tsraith seo, an seó teilifíse is daoire ar domhan mar a chuala mé duine ag cur síos air. 

Ní hé sin le rá, ar ndóigh, go bhfuil muintir Russo tar éis éacht a dhéanamh anseo pé scéal é, agus tá an scannán an mhaith, ach tá sé feicthe agam ó go leor léirmheasanna eile gur victory lap é seo do go leor de na carachtair, na haisteoirí agus don stiúideo féin. A

gus cé go bhfuil sé sin tuillte go maith acu tar éis aon bhliain déag, agus 22 scannán, airím go mbeidh sé seo tuirsiúil faoin tríú huair an chloig do go leor daoine. Ach sin mise ag caint le mo chaipín léirmheasa orm. Mar lucht leanúna Marvel áfach, agus chun athleagan a dhéanamh ar fhocail an Captaen ‘I could watch this all day’. 

Níos mó
NÓS | NÓS