Cabhair á lorg ag Liú Lúnasa
Cuirfear tús leis an 5ú Liú Lúnasa ag deireadh na míosa seo agus tá do chúnamh ag teastáil ón bhféile phobail Ghaeilge i mBéal Feirste.
Tráthúil go leor, i mbliana tá cúig lá lán imeachtaí beartaithe ag lucht eagraithe na féile imeall-chultúir, a bhíonn á reáchtáil gach bliain ag coiste deonach, agus táthar i mbun feachtas bailithe airgid faoi láthair chun cabhrú leis an eagrúchán.
£1,500 an sprioc atá acu agus rachaidh an t-airgead i dtreo costaisí éagsúla, ionaid agus ceoltóirí mar shampla, a chlúdach.
Bunaíodh Liú Lúnasa in 2015 mar fhéile mhalartach chun an Ghaeilge agus pobal a labhartha a thabhairt amach as a réimse traidisiúnta, chun ardán a thabhairt do cheoltóirí agus ealaíontóirí Gaelacha, chun nascadh leis na pobail éagsúla i mBéal Feirste agus chun dul i ngleic le ceisteanna an tsaoil.
Tá an fhealsúnacht sin le brath go fóill i gclár na bliana seo, ina bhfuil ranganna, seoltaí leabhair, drámaí agus ceolchoirmeacha le leithéidí Dysania agus Tadhg, ach cainteanna ar an ngéarchéim thithíochta agus ar chás na mban i saol na n-ealaíon chomh maith.
Is féidir a bheith cinnte de, fosta, go mbeidh rath mór ar an Slam Filíochta clúiteach sa Black Box i lár Bhéal Feirste, áit a mbeidh Sinéad Ní Uallacháin an tí seo agus RTÉ mar bhean an tí agus a dtabharfar ticéad do Electric Picnic don bhuaiteoir.
An Liú Abú!
Beidh Liú Lúnasa 2019 ar siúl an 21-25 Lúnasa agus is féidir tacú lena bhfeachtas bailithe airgid anseo.
