Tá seacht scoil lán-Ghaeilge i measc an 50 iarbhunscoil ‘is fearr’ sa stát, de réir rangú an Sunday Times.
Dhá scoil lán-Ghaeilge do chailíní atá sa dá scoil is airde ar an liosta.
Tá an scoil lán-Ghaeilge Coláiste Chnoc na Labhras i Luimneach ar an iarbhunscoil ‘is fearr’ sa stát den séú bliain as a chéile, de réir rangú The Sunday Times, agus tá Coláiste Íosagáin i mBaile Átha Cliath sa dara háit ar an liosta 400 scoil.
Is iad na scoileanna lán-Ghaeilge eile atá áirithe i measc an 50 scoil ‘is fearr’ sa Stát ná Coláiste na Coiribe, Gaillimh, atá sa 10ú háit, Coláiste Eoin, Baile Átha Cliath, atá san 16ú háit, Coláiste Íde sa Daingean atá sa 37ú háit, Gaelcholáiste Luimnigh atá sa 41ú háit, Coláiste Cois Life, Baile Átha Cliath, atá sa 46ú háit, agus Coláiste Pobail Osraí atá sa 50ú háit.
| Scoil | Contae | Rangú Náisiúnta |
|---|---|---|
| Coláiste Chnoc na Labhras | Luimneach | 1 |
| Coláiste Íosagáin | BÁC | 2 |
| Coláiste na Coiribe | Gaillimh | 10 |
| Coláiste Eoin | BÁC | 16 |
| Coláiste Íde | Ciarraí | 37 |
| Gaelcholáiste Luimnigh | Luimneach | 41 |
| Coláiste Cois Life | BÁC | 46 |
| Coláiste Pobail Osraí | Cill Chainnigh | 50 |
| Gaelcholáiste Ciarraí | Ciarraí | 69 |
| Gaelcholáiste Cheatharlach | Ceatharlach | 78 |
Tá scagadh déanta ag Tuairisc.ie ar an tábla agus liosta de na 10 ngaelcholáiste agus na 10 iar-bhunscoil Ghaeltachta is fearr sa stát curtha i dtoll a chéile againn bunaithe ar an eolas a foilsíodh in The Sunday Times.
De réir, an eolais sin, tá Coláiste na Coiribe i nGaillimh sa chéad áit i gCúige Chonnacht maidir le soláthar daltaí d’institiúidí tríú leibhéal. Tá ceithre scoil Ghaeltachta eile i measc an 20 scoil ‘is fearr’ i gConnachta: Coláiste Gobnait, Inis Oírr; Scoil Phobail Mhic Dara, Carna; Coláiste Chroí Mhuire, an Spidéal; agus Scoil Chuimsitheach Chiaráin, an Cheathrú Rua. Tá Coláiste Íde sa Daingean sa tríú háit i gCúige Mumhan agus tá Pobalscoil Chorca Dhuibhne san 18ú háit. Tá Pobalscoil Ghaoth Dobhair sa séú háit i gCúige Uladh.
Bunaíodh na staitisticí ar eolas a bailíodh faoi líon na ndaltaí in iarbhunscoileanna uile na tíre a chuaigh ar aghaidh go dtí 32 institiúid tríú leibhéal thuaidh agus theas.
Baineann conspóid i gcónaí le foilsiú leithéidí na dtáblaí seo agus go leor saineolaithe oideachais den tuairim gur róchúng an tslat tomhais iad chun breithiúnas a thabhairt ar chaighdeán an oideachais a chuirtear ar fáil i scoileanna na tíre.
| Scoil | Contae | Rangú Náisiúnta |
|---|---|---|
| Coláiste na Coiribe | Gaillimh | 10 |
| Coláiste Íde | Ciarraí | 37 |
| Coláiste Ghobnait, Inis Oírr | Gaillimh | 79 |
| Scoil Mhuire, Béal Átha an Ghaorthaidh | Corcaigh | 107 |
| Pobalscoil Chorca Dhuibhne | Ciarraí | 116 |
| Scoil Pobal Mhic Dara, Carna | Gaillimh | 124 |
| Coláiste Chroí Mhuire, An Spidéal | Gaillimh | 137 |
| Scoil Chuimsitheach Chiaráin, An Cheathrú Rua | Gaillimh | 144 |
| Pobalscoil Ghaoth Dobhair | Dún na nGall | 189 |
| Coláiste Pobail Ráth Chairn | Co na Mí | 270 |
