![<a-href="https://tuairisc.ie"-class="credit-tuairisc"-target="-blank"-rel="noopener-noreferrer"></a>-dlus-a-chur-aris-le-plean-an-rialtais-chun-an-tir-a-athoscailt](https://peig.ie/wp-admin/admin-ajax.php?action=kernel&p=image&src=%7B%22file%22%3A%22wp-content%2Fuploads%2F2020%2F06%2F24553%2Fdlus-a-chur-aris-le-plean-an-rialtais-chun-an-tir-a-athoscailt.jpg%22%2C%22thumbnail%22%3A%22960%2C%2C%22%7D&hash=320fbe00)
Dlús á chur arís le plean an rialtais chun an tír a athoscailt
Beidh cruinnniú inniu ag an bhFoireann Náisiúnta um Éigeandáil sa tSláinte Phoiblí (NPHET) chun plé a dhéanamh ar conas an plean díchuibhrithe a ghiorrú go dtí dhá chéim.
Dúirt Príomh-Oifigeach Leighis na Roinne Sláinte, an Dr Tony Holohan, go bhféadfaí dlús a chur arís le scaoileadh na srianta dianghlasála toisc scaipeadh an ghalair a bheith ag dul i léig i gcónaí.
“Táthar chun athbhreithniú a dhéanamh ar an gcomhairle a chuir an Fhoireann Náisiúnta um Éigeandáil sa tSláinte Phoiblí (NPHET) ar fáil maidir le plean an rialtais chun an tír a athoscailt i bhfianaise an galar a bheith á chur faoi chois sa phobal agus daoine a bheith ag cloí den chuid is mó leis na bearta sláinte phoiblí.”
Dúirt an Leas- Phríomhoifigeach Leighis, Ronan Glynn, gur léirigh na slata tomhais go léir gurb amhlaidh an scéal.
“Tá an ráta téarnaimh ón ngalar sa tír seo ag 92%. Comhartha é sin agus an uimhir R nó ráta scaipthe an ghalair, agus an líon daoine a chuirtear san ospidéal agus sna haonaid dianchúraim go bhfuil muid ag dul sa treo ceart.”
Tá sé i gceist ag an Rialtas roinnt cinntí faoi scaoileadh na srianta a dhéanamh amárach.
Dúirt an tAire Sláinte, Simon Harris sa Dáil inné go meastar go bhfuil ráta scaipthe an Covid-19 ag 0.7.
Dúirt an tAire gur deacair an ráta atáirgthe a mheas de bharr a laghad cásanna den ghalar atá á n-aimsiú faoi láthair.
Dúirt sé go raibh sé “an-tábhachtach” go mbeadh daoine ar an airdeall ionas nach dtolgfaimis agus nach scaipfimis an galar “agus muid i mbun gnáthchúraimí an lae”.
Is ionann ráta scaipthe 0.7 agus a rá dá bhfaigheadh deichniúr Covid-19, go dtabharfaidís an víreas do sheachtar eile eatarthu.
Tá NPHET ag plé scaoileadh na srianta tráth a bhfuil dréacht-treoirlínte eisithe ag an Ionad Faireachais um Chosaint Sláinte (HPSC) ina dtugtar le fios go mb’fhéidir go mbeadh bialanna agus tithe tábhairne a chuireann bia ar fáil don phobal ábalta an scoitheadh sóisialta dhá mhéadar a laghdú go dtí méadar amháin i gcúinsí ar leith.
Tuairiscítear go mbeidh ar thithe tábhairne agus bialanna, nuair a osclóidh siad níos déanaí an mhí seo, teorainn 90 nóiméad a chur ar an am a chaithfidh a gcuid custaiméirí san áit. Bheadh ar chustaiméirí an chuairt ar an ósta a chur in áirithe roimh ré.
D’fhógair an Roinn Sláinte tráthnóna inné go raibh triúr eile a raibh Covid-19 orthu básaithe agus ocht gcás nua den ghalar deimhnithe.
D’fhógair Roinn Sláinte an Tuaiscirt go raibh duine amháin eile a raibh an aicíd tolgtha aige básaithe agus deimhníodh ocht gcás nua ansin.
2,253 duine ar a laghad atá básaithe in Éirinn ó thús na paindéime, 1,710 duine ó dheas den teorainn agus 543 ó thuaidh di.
Beirt ó dheas ar tugadh an Covid-19 mar shiocair bháis dóibh roimhe seo, tá sé deimhnithe anois nárbh amhlaidh an scéal.
30,203 cás den ghalar Covid-19 atá deimhnithe go dtí seo in Éirinn, 25,341 cás ó dheas den teorainn agus 4,862 cás ó thuaidh.
Duine amháin a bhásaigh de bharr an choróinvíris ó thuaidh den teorainn le lá anuas, de réir tuairisc na Roinne Sláinte ansin.
Daoine a bhásaigh in ospidéal is mó a thuairiscítear ó thuaidh.