Fontaines DC, Greg Foat, agus Al Wootton – Albaim na Míosa
Fontaines DC – ‘A Hero’s Death’ (Partisan)
A Hero’s Death by Fontaines D.C.
Fé mar a dúirt Elvis Costello tráth, tá a saol ar fad ag grúpa chun a n-albam début a scríobh ach bíonn orthu é a shárú le albam uimhir a dó taobh istigh d’achar gearr ama. Má bhí amhras ar Fontaines DC nach raibh albam eile ar chaighdeán Dogrel iontu, agus ba imní den saghas sin, de réir dealraimh a spreag amhránaí an ghrúpa Grian Chatten chun liricí féin-chúnaimh an amhráin ‘A Hero’s Death’ a chumadh, níor ghá dóibh a bheith buartha.
Tá ceol an albaim seo níos moille agus níos saibhre ná Dogrel, agus cé go mbeadh leisce orm a rá go bhfuil A Hero’s Death níos fearr ná a début, admhaím go dtaitníonn sé níos mó liom. Amhráin ionraice, fhileata iad seo. Cogar macánta i gcluas glúine, Gratten ag ímpí ort gan a bheith i do sclábhaí ag an gcóras caipitlíoch, i do chime cuibhrithe ag caidrimh idirphearsanta agus, fiú, gan diúltú don saol ar mhaithe le do shláinte. Crógacht thógálach.
Greg Foat – ‘Symphonie Pacifique’ (Strut)
Is mó cúnamh a thug an t-albam is déanaí seo leis an bpianódóir snagcheoil Greg Foat dom chun dul i ngleic le haiteas na dianghlasála ná aon sraith Netflix. An séú halbam eisithe ag Foat ó thús na bliana 2019, is saothar misniúil, ilchineálach é Symphonie Pacifique. Ní raibh riamh aon easpa samhlaíochta ag baint le cur chuige cumadóireachta Foat, agus sa chás seo tugann tionlacann Moses Boyd (drumaí) agus Phil Achille (dord) saoirse do Foat gluaiseacht ó shnagcheol aoibhinn liriciúil go fhuaim thaibhsiúil agus func leachtach gan cos a chur amú. Saothar suaithinseach.
Al Wootton – ‘Witness’ (Trule)
Tá cáil ar Al Wootton as a bhuamaí de rianta dordcheoil don urlár rince eisithe faoin ainm Deadboy ar lipéid mar Numbers agus Local Action. Ar Witness fileann Wootton ar bhunphrionsabail an cheoil dub agus UK Garage chun saothar dordcheoil domhain, dinimiciúil a chruthú don éisteoir baile.
Cé go ndeir Wootton gur spreag fuinneamh amh clasaiceach albaim druma agus dord na seanré mar Timeless le Goldie agus Modus Operandi de chuid Photek i mbun gnímh é, tá stíl cheoil Witness féin ina chumasc d’eilimintí dub-teicneo leithéidí Basic Channel, dub-reigé Scientist agus an síog mhéith sin idir cheol dubchéime agus 2-step garage ar thug Sully faoi ar an albam ‘Carrier’ siar in 2011. Ceol fíréanta don ngaiscíoch dordcheoil aonar.
