Slam Filíochta Liú Lúnasa agus imeachtaí eile
Comórtas Slam Filíochta Liú Lúnasa 2020, cainéal YouTube Chultúrlann McAdam Ó Fiaich // Dé hAoine 28 Lúnasa @ 20:30
Bhí deis agam níos luaithe sa tseachtain éisteacht le chuid de na dánta atá san iomaíocht tráthnóna don gcomórtas Slam Filíochta – tá an caighdeán ard! Beidh sé deacair ar an moltóir, Séamus Barra Ó Súilleabháin buaiteoir a roghnú, shamhlóinn. Tá duaiseanna dochreidte maith bailithe ag lucht na féile Liú Lúnasa i mbliana – £400, £200 agus £100 dóibh siúd a thiocfaidh sa chéad, dara agus tríú háit, curtha ar fáil go flaithiúil ag An Nasc, Raidió na Life agus An tUltach.
De ghnáth is teanntaithe isteach go deas cluthair in ionad i mBéal Feirste an tráth seo bliana a bhímid, ach ní hamhlaidh atá i mbliana ar an drochuair. Nach cuma, bígí ag faire ar chainéal YouTube Chultúrlann McAdam Ó Fiaich anocht go gcífidh sibh an comórtas ó thús go deireadh. Caith súil ar an alt seo chun sonraí faoi na féile trí chéile a fháil!
Ceolchoirm ó lucht Mhúscraí, leathanaigh Facebook agus YouTube an Ionaid Chultúrtha // 20:00 anocht, Dé hAoine 28 Lúnasa
Ceoltóirí agus ealaíontóirí Mhúscraí a bheidh le clos tráthnóna mar chuid d’ócáid atá eagraithe ag lucht Ionad Cultúrtha an Dr. Ó Loinsigh i mBaile Bhuirne. Cleas na háite nó iad siúd a bhfuil ceangal acu leis an áit a bheidh i mbun an cheoil agus na siamsaíochta, ina measc bainisteoir an ionaid, Aoife Granville agus a deirfiúr ceolmhar Deirdre.
Na haíonna eile a fheicfear anocht, ná Amhlaoibh McSuibhne, Máire Ní Cheilleachair, Ger Wolfe, Siobhán Ní Dhuinnín in éineacht le Claire Ní Mhuirthile, Greenshine agus Jim Murray i dteannta an bhoscadóra Richard Lucey. Cuirfear tús leis an spraoi timpeall a hocht a chlog agus tiocfaidh sibh air ar leathanaigh YouTube agus Facebook an Ionaid. Beidh sibh in ann féachaint siar air ina dhiaidh seo, mura n-éiríonn libh díriú air tráthnóna.
Ranganna fidle le Máiréad Ní Mhaonaigh, ar-líne
Ar mhaith leat ceol a fhoghlaim ó dhuine de mhórcheoltóirí ár linne? Ní i gcónaí go mbíonn a leithéid de dheis ann… ach tá an sár-fhidléir Máiréad Ní Mhaonaigh anois ag tabhairt ranganna ar-líne. Tá cáil mhór ar Mháiréad as a cuid ceoil ní hamháin leis an mbanna Altan ach mar cheoltóir aonair chomh maith.
Gheobhaidh sibh gach eolas faoi na ranganna agus conas tabhairt fúthu ach cuairt a thabhairt ar mairead.ie
Seans go mbeadh sé ina thionscnamh beag deas do dhuine le spéis sa cheol, do mhíonna an gheimhridh!
Siúlóidí treoraithe i gCiarraí le Richard Clancy
Is treoraí siúlóide é Richard Clancy a rugadh agus a tógadh i gCill Áirne. Is minic a bhíonn sé le clos ar Raidió na Gaeltachta agus é ag trácht ar nithe éagsúla a bhaineann le Páirc Náisiúnta an bhaile – biaiste reithíochta na bhfianna, nó stádas na Páirce mar bhithsféar caomhnaithe, cuirim i gcás.
Eagraíonn sé siúlóidí ann i rith na seachtaine, mar aon le siúlóidí sléibhe sa cheantar máguaird. Is breá leis an Ghaeilge agus labhrann sé í agus é i mbun treoraithe, chomh maith leis an mblúire Spáinnise atá aige. Ní leis féin a bhíonn sé ach an oiread – mar go dtagann a mhadra Rua, (sotar rua), ina theannta. killarneyguidedwalks.com do na mion sonraí ar fad.
