Tá Foras na Gaeilge chun scrúdú eile a reáchtáil an bhliain seo chugainn do dhaoine a theastaíonn uathu Séala an Aistriúcháin a bhaint amach.
Ní raibh sé i gceist an scrúdú aistriúcháin a reáchtáil arís go dtí 2022 ach, mar a tuairiscíodh ar an suíomh seo an tseachtain seo caite, bhí díomá ar roinnt daoine nuair a cuireadh stop go luath le glacadh iarratais ar an scrúdú a bhí ar siúl Dé Sathairn seo caite.
Cé gur tugadh le fios go mbeifí ag glacadh le hiarratais go dtí a 4.00pm an 19 Samhain, níor glacadh le hiarratais ar bith i ndiaidh an 10 Samhain, lá i ndiaidh an fhógra go raibh an próiseas iarratais oscailte.
Faoin am gur cuireadh stop go tobann leis an phróiseas bhí iarratas faighte ó 55 duine agus socraíodh deis a thabhairt do na daoine sin go léir an scrúdú a dhéanamh.
Agus an cinneadh scrúdú breise a reáchtáil an bhliain seo chugainn á fhógairt aige, dúirt Éamonn Ó hArgáin, Stiúrthóir Seirbhísí Forbartha Fhoras na Gaeilge, gur dea-scéala é go raibh oiread éilimh ar an scrúdú i mbliana.
“Bhí éileamh i bhfad níos mó ar an scrúdú i mbliana ná mar a bhí muid ag súil leis, rud atá an-dearfach agus rud le ceiliúradh. Tá soláthar aistritheoirí an-tábhachtach faoi láthair agus deireadh ag teacht leis an maolú ar an nGaeilge san Aontas Eorpach in 2022, agus le reachtaíocht don Ghaeilge ar na bacáin ó thuaidh agus ó dheas.
“Dá réir sin, tá sé i gceist againn scrúdú eile a eagrú in 2021 le deis a thabhairt dóibh siúd nár éirigh leo áit a fháil ar an scrúdú i mbliana.”
Bunaíodh an Séala d’aistritheoirí in 2006 agus é áirithe ar an cháilíocht gairmiúil is tábhachtaí do shaoraistritheoirí na Gaeilge a bhíonn ag lorg oibre ó eagraíochtaí san earnáil phoiblí nó ó chliaint eile.
Cuirtear ainm agus sonraí teagmhála gach duine a ghnóthaíonn an Séala ar phainéal d’aistritheoirí creidiúnaithe a fhoilsíonn Foras na Gaeilge agus is ón phainéal sin a earcaítear aistritheoirí Gaeilge den chuid is mó.
Léirigh figiúirí a d’fhoilsigh an tAE anuraidh an dúshlán mór atá le sárú i gcónaí maidir le dóthain aistritheoirí le Gaeilge a fhostú in institiúidí na hEorpa.
Meastar go dtiocfaidh méadú 40% ar an méid oibre aistriúcháin go Gaeilge a bheidh le déanamh in 2022, tráth a bhfuil geallta go gcuirfear deireadh leis an maolú ar stádas na Gaeilge san Aontas Eorpach.
Ach níor líonadh ach níos lú ná 25% de na folúntais d’aistritheoirí agus dlítheangeolaithe Gaeilge a fógraíodh idir 2016-2018.
