Tá focail Gàidhlig agus Bhreatnaise mar chuid d’fheachtas atá ag baint úsáid as mionteangacha chun aird a tharraingt ar an nasc atá ann idir an duine agus an dúlra.
Tá an togra ‘Living Language Land’ a seoladh le linn na comhdhála Cop26 i nGlaschú agus súil ann go rachaidh sé i gcion ar cheannairí an domhain.
Tá 25 focal ó mhionteangacha éagsúla roghnaithe mar chuid den togra agus baint acu uile leis an dúlra.
Chomh maith le teangacha atá in úsáid sa Cholóim, i Meiriceá, i ndeisceart na hAfraice agus áiteanna eile, roghnaíodh focail ó cheithre theanga a labhraítear sa Bhreatain – an Ghàidhlig, an Bhreatnais, Dórais agus an seanBhéarla a labhraítear cois cósta i Northumbria.
Roghnaíodh an focal Gàidhlig Aibidil, a chiallaíonn aibítir. D’fhorbair an aibítir na Gaeilge ó ogham agus tá gach ceann den 18 litir ainmnithe as crann.
An focal Morfa a roghnaíodh don Bhreatnais. Ciallaíonn an focal áit atá in aice na farraige nó cruthaithe ag an bhfarraige.
Rinneadh gach ceann de na focail a thaifeadadh agus cruthaíodh ealaín agus físeáin dhúchasacha a bhfuil ceangal acu leis na focail.
Chomh maith leis an 25 focal a roghnaíodh, tá taifeadadh déanta ar an ngaoth ag séideadh san Antartach, an t-aon mhór-roinn nach bhfuil aon teanga dhúchais inti.
Tá an togra maoinithe ag Comhairle na Breataine.
