4,115 cás nua den Covid-19 a d’fhógair an Roinn Sláinte tráthnóna.
511 othar atá buailte ag an ngalar atá sna hospidéil, 19 duine níos lú ná mar a bhí ansin inné. Tá 110 díobhsan in aonad dianchúraim, cúigear níos lú ná mar a bhí inné.
Dúirt an Dr Tony Holohan, Príomhoifigeach Leighis na Roinne Sláinte, go raibh cúrsaí an ghalair “an-éiginnte agus an-ghuagach” agus an cineál Delta den víreas á scaipeadh go tréan i gcónaí.
“Is údar imní an-tromchúiseach é sin agus sinn ag fanacht ar a thuilleadh eolais faoi chineál an Omicron agus an tionchar a d’fhéadfadh a bheith aige sin.
”Faoi láthair, bunaithe ar an bhfianaise atá ar fáil dúinn is dóigh linn go n-éireoidh leis na beartais sláinte phoiblí a bhfuil oiread sin taithí againn orthu moill agus stop a chur le scaipeadh an Omicron agus an Delta. De réir na gcomharthaí luatha, tabharfaidh an teanndáileog den vacsaín Covid-19 cosaint mhaith duit ó ionfhabhtú ón Delta agus ón Omicron.”
Mhol an Dr Holohan do gach duine a bhí i dteideal teanndáileog a fháil déanamh amhlaidh a luaithe agus ab fhéidir é.
D’fhógair Roinn Sláinte an Tuaiscirt inniu go raibh beirt eile ar a raibh an Covid-19 tar éis bháis. 1,806 cás nua a fógraíodh ansin inniu.
317 othar Covid-19 atá in ospidéil an Tuaiscirt agus 40 díobhsan atá in aonad dianchúraim.
