Is i nGaeilge a chuir Ard-Mhéara nua Bhéal Feirste tús lena aitheasc oscailte os comhair Chomhairle Cathrach Bhéal Feirste an tseachtain seo. Ag cruinniú míosúil de chuid na Comhairle, ba i nGaeilge a chuir an Comhairleoir de chuid Pháirtí na Comhghuaillíochta (Alliance), Michael Long, é féin in aithne mar an méara nua. Dúirt sé go raibh “áthas air a bheith mar Ard-Mhéara nua ar Bhéal Feirste”.
Is é Michael Long fear céile cheannaire an pháirtí Alliance, Naomi Long, agus ní bheidh sé ina mhéara ach ar feadh trí seachtaine, an tréimhse is gaire a bhí ag aon mhéara sa chathair go dtí seo. Toghadh an t-iarmhéara Kate Nicholl mar theachta de chuid Alliance chuig Tionól Thuaisceart Éireann le deireanaí.
Ghabh an Comhairleoir Ciaran Beattie ó Shinn Féin buíochas leis an méara nua as “an suíochán a choinneáil te”. Ainmneofar an chéad mhéara eile as ionadaithe tofa Shinn Féin sa gComhairle.
Dúirt an tArd-Mhéara nua, Michael Long, go bhfuil an-bhród air gurb é an dara Ard-Mhéara ar Bhéal Feirste a rugadh i gCeanada, agus an dara Ard-Mhéara as a chéile a rugadh thar lear.
Dúirt sé go dtugann sé sin teachtaireacht an-dearfach go bhfuil an chathair oscailte agus fáilteach agus í ag iarraidh freastal ar gach éinne sa tsochaí.
