Tá Mikhail Gorbachev, iarcheannasaí Aontas na bPoblachtaí Sóivéadacha Sóisialacha, tar éis bháis.
Bhí sé 91 bliain d’aois.
Bhí Mikhail Gorbachev ar dhuine de na polaiteoirí is mó a d’fhág a lorg ar stair an 20ú haois.
Bhí an Taoiseach Michéal Martin ar dhuine de na ceannairí ar fud an domhain a léirigh ómós do Gorbachev ar uair a bháis.
“Athraíodh an domhan mar gheall ar a thuiscint don stair, a thiomantas don oscailteacht, don athchóiriú agus do thógáil droichead leis an Iarthar,” arsa Michéal Martin.
Ba é Gorbachev a bhí i bhfeighil ar an Aontas Sóivéadach nuair a tháinig deireadh leis 70 bliain i ndiaidh a bhunaithe.
Cuimhneofar ar Gorbachev, a tháinig i gcumhacht i 1985, mar gheall ar an mbaint a bhí aige le deireadh a chur leis an gCogadh Fuar agus a ról in oscailt a thíre
Nuair a leag sé amach a phlean chun a thír a athrú I 1985 an t-aon aidhm a bhí aige ná athbheochan gheilleagair marbhánta an Aontais agus a chóras polaitiúil a leasú, ach ba é titim a thíre toradh a shaothair.
Ba iad na polasaithe is mó a thuill cáil dó ná perestroika – athstruchtúrú–a bhí dírithe ar athbheochan an gheilleagair agus glasnost – oscailteacht – a thug tús áite don liobrálachas agus don iolrachas in áit na cinsireachta agus an mhaorlathais thíoránta.
Spreag a chuid athruithe eachtraí éagsúla arb é an toradh a bhí orthu ná deireadh réimeas na gCumannaithe sa USSR agus ina stáit satailíte.
Cé gur ómós is mó a thuill Gorbachev san Iarthar mar gheall ar an mbaint mhór a bhí aige le titim an Chuirtín Iarainn, ní raibh an meas céanna ag mórán de mhuintir na Rúise air. Chuir go leor sa Rúis an milleán air as dul i léig na tíre.
