Dá laghad barúil a bhí ag daoine den pháirtí Daonlathach sna toghcháin lár téarma sna Stáit Aontaithe, níor tháinig an tuar faoin “maidhm dhearg” a raibh tuairisceoirí is saineolaithe ag trácht uirthi le linn an fheachtais.
Bhíothas ag tuar go dtiocfadh an páirtí Poblachtánach i dtír go breá réidh ar chúrsaí eacnamaíochta na tíre agus an boilsciú níos airde i Meiriceá faoi láthair ná a bhí sé le daichead bliain. Cuir leis sin Uachtarán Daonlathach sa Teach Bán nach bhfuil aon mhórghean air, a dúradh.
A mhalairt is cosúil a tharla mar go bhfuil chuile chosúlacht air ón méid atá deimhnithe gur sna toghcháin seo is measa riamh a chruthaigh páirtí nach raibh i gcumhacht agus a bhí ag tabhairt faoi Uachtarán a bhí ina chéad téarma san oifig.
Tá torthaí á bhfógairt sna toghcháin lár téarma go fóill agus an chuma air go bhfuil ceannas na Comhdhála fós idir dhá cheann na meá agus pobal Mheiriceá deighilte go damanta i gcónaí.
Tá an chosúlacht ar na réamh-mheastacháin go n-éireoidh leis an bpáirtí Poblachtánach smacht a fháil ar Theach na nIonadaithe ach go mbeidh sé ina chath go deireadh faoin Seanad.
Sa gcás go gcaillfidh an Páirtí Daonlathach smacht ar cheachtar teach, beidh an páirtí Poblachtánach in ann cosc a chur le clár oibre an Uachtaráin Joe Biden.
Bhí dea-scéal ag an Uachtarán as Pennsylvania mar gur éirigh leis an Daonlathach, John Fetterman an suíochán sa Seanad a bhaint d’iarrthóir an pháirtí Phoblachtánaigh Mehmet Oz. Bhí imní faoi shláinte Fetterman agus é ag téarnamh ó stróc a bhuail é mí na Bealtaine. Fuair na Daonlathaigh dhá shuíochán eile a rabhthas buartha fúthu – Maggie Hassan i New Hampshire agus Michael Bennet in Colorado. In Ohio d’éirigh le JD Vance, an fear a scríobh Hillbilly Elegy, suíochán a sciobadh do na Poblachtánaigh.
Mar sin féin is léir ag an tráth seo gur cuilithín a bhí sa ’mhaidhm dhearg’ a bhí á tuar.
Tá cúpla suíochán Seanaid faoina raibh an iomaíocht fíorghéar nach bhfuil na torthaí fógartha fós iontu, agus d’fhéadfadh gur vóta eile i dtús mhí na Nollag a bheadh ag teastáil in Georgia.
Dá n-éireodh leis an bpáirtí Daonlathach suíochán a fháil in Arizona agus i Nevada, d’fhéadfaidís tromlach a bheith acu sa Teach Uachtarach.
Bhí an t-iarUachtarán Donald Trump an-ghníomhach san bhfeachtas ach níor éirigh le cuid de na hiarrthóirí ar thug sé a bheannacht dóibh suíochán a fháil. Tá caint go leor ann go bhfógróidh sé an tseachtain seo chugainn go bhfuil rún aige tabhairt faoin fheachtas 2024 na hUachtaránachta, an tríú feachtas aigesean.
Bhí Trump ag súil gur cleití geala ina chaipín a bheadh sna hiarrthóirí ar thacaigh sé leo ach a bhfaighidís suíocháin ach níor chruthaíodar chomh hiontach agus a bhí súil leis.
“Tráthnóna suimiúil” an léirmheas a bhí ag an iarUachtarán ar fhógairt na dtorthaí.
D’éirigh thar cionn le Gobharnóir Poblachtánach Florida, Ron DeSantis. Tá a phost coinnithe go héasca aige agus bail mhaith air dá mbuailfeadh fonn é tabhairt faoi ainmniúchán na bPoblachtánach don uachtaránacht in 2024.
Tá áthas ar dhaoine atá ar son na rogha mar gur éirigh leo cearta ginmhillte a chosaint sa dlí in Vermont, Michigan agus California.
