‘Tá níos mó ná imreoirí óga ag teastáil ó na cúigí’
Is trua é nach raibh fáil ar Robbie Henshaw in aghaidh na hAfraice Theas i gcéad chluiche idirnáisiúnta an fhómhair. Deis iontach a bhí ann do Stuart McCloskey teacht isteach san fhoireann, go háirithe tar éis cúpla séasúr iontach d’Ulaidh. Gortaíodh go luath é sa chluiche sin ach d’éirigh leis téarnamh chun imirt in aghaidh Fidsí an tseachtain seo chaite. Roghnaíodh é don chluiche in aghaidh na hAstráile freisin cé go raibh fáil ar Bundee Aki, ach caithfidh Aki a bheith sásta le áit ar an mbinse.
Bhí an comhrá céanna ann maidir le Jack Crowley anois. Roghnaíodh Johnny Sexton, ar ndóigh, tar éis a fógraíodh go raibh sé aclaí. Níl fáil ar Carbery, agus mar sin tá Crowley ar an mbinse. Ach bhí comhrá ann i rith na seachtaine faoi Crowley: ar cheart eisean a roghnú ag uimhir a deich chun doimhneacht san fhoireann a chruthú?
Is comhrá aisteach é an comhrá faoi dhoimhneacht foirne mar is ábhar casta é. Ní leor é imreoir eile a thabhairt isteach in áit imreoir eile: caithfidh an t-imreoir nua a bheith in ann an stíl imeartha agus struchtúr ionsaithe agus cosanta na foirne a insealbhú sa chluiche ón tús. Teastaíonn na tréithe céanna sna himreoirí seo ó thaobh smachta de, go háirithe ag an leibhéal is airde.
Luaigh mé McCloskey ag tús an phíosa. Fuair sé deis mar go bhfuil Henshaw gortaithe agus ní raibh fáil ar Aki don chéad dhá chluiche. Ach tá na tréithe céanna ag an triúr acu: tá siad thar a bheith fisiciúil agus iad ag imirt, tá dáileadh na liathróide maith acu, agus buann siad na himbhuailtí. Is imreoir iontach é Rory Scannell freisin: is é an t-imreoir is óige chun 100 cluiche a imirt don Mhumhain, tá láimhseáil an-mhaith aige, agus is ciotóg é (bua iontach d’imreoir lár páirce). Ach níl an fhisiciúlacht chéanna aige is atá ag an triúr eile agus mar sin, cé gur imreoir iontach é, ní rogha é mar ionadaí don triúr thuasluaite.
Tá go leor imreoirí ag imirt in hÉirinn faoi láthair nach bhfuil ag imirt don fhoireann náisiúnta agus nach mbeidh ag imirt léi go luath ach an oiread ach ní drochimreoirí iad in aon chor. Féach ar Billy Burns atá ag imirt le hUlaidh. Anuraidh, d’imir Billy Burns 24 cluiche d’Ulaidh agus thosaigh sé gach aon cheann acu. D’imir sé 1,760 nóiméad don chúige anuraidh.
Ach, cé nár imir Jack Crowley ach 456 nóiméad i dtrí chluiche dhéag, eisean atá sa chomhrá don chéad chluiche idirnáisiúnta eile. Ní drochimreoir é Billy Burns. Is foireann iontach í Ulaidh faoi láthair buíochas le ionchur Burns. Stiúrann sé ionsaí Uladh go héifeachtach agus ní roghnófaí é mura raibh sé in ann é sin a dhéanamh
Is ábhar casta í doimhneacht. Tuigim go bhfuil daoine ag iarradh imreoirí óga ag fáil na ndeiseanna imeartha seo. Nó b’fhéidir go bhfuil siad ag iarradh go mbeadh duine óna gcúige dúchais a fheiceáil ar an bpáirc. Ach tá níos mó gnéithe ag teastáil ná sin.
