Tá taithí oibre san Aontas Eorpach le cur ar fáil do dheichniúr céimithe agus scéim intéirneachta fógartha.
Mar chuid den scéim atá á reáchtáil ag Roinn na Gaeltachta, tabharfar deiseanna do chéimithe socrúcháin oibre a fháil sna haonaid Ghaeilge in institiúidí an Aontais Eorpaigh, i réimsí an aistriúcháin agus na profléitheoireachta.
Tugann an scéim, atá á reáchtáil ó 2018, deis do deichniúr dul i mbun taithí oibre san Aontas ar feadh deich mí ó mhí Dheireadh Fómhair seo chugainn.
Beidh ochtar de na céimithe ag cuidiú go príomha le haistriú reachtaíocht an Aontais Eorpaigh – an acquis communautaire – le linn an tsocrúcháin oibre. Beidh beirt ag obair mar phrofléitheoirí faoi mhaoirseacht in Oifig na bhFoilseachán nó i bParlaimint na hEorpa agus doiciméid i nGaeilge le profléamh acu.
Íocfar liúntas €2,000 in aghaidh na míosa leis na hintéirnigh ó thús deireadh na tréimhse oiliúna deich mí.
Agus é ag fógairt na scéime i mbliana, dúirt an tAire Stáit Patrick O’Donovan go raibh an-tóir ar an scéim ó cuireadh tús léi cúig bliana ó shin.
“Tugtar deis do dhaoine blaiseadh a fháil den saol oibre ar mhór-roinn na hEorpa, oiliúint den scoth a fháil ó na hinstitiúidí Eorpacha, agus cur lena gcuid scileanna ionas go mbeidh siad i riocht láidir sna comórtais earcaíochta amach anseo.
“Cheana féin tá roinnt mhaith de na hintéirnigh tar éis poist eile a fháil sna hinstitiúidí Eorpacha tar éis dóibh an socrúchán oibre seo a dhéanamh, agus tá an-dóchas agam go n-éireoidh chomh maith céanna le hintéirnigh na bliana seo,” a dúirt an tAire Stáit.
Is féidir gach eolas faoin scéim a fháil anseo agus glacfar le hiarratais ar an ríomhphost ón gCéadaoin, 12 Aibreán 2023 go 12 meán lae Dé Luain, 8 Bealtaine 2022.
