An chomhairle is fearr a bhfuair tú agus an Ardteist idir lámha agat

Arlene Ní Chonbhuí

Dea-aimsir, uachtar reoite agus bríste gearra – tuigimid ar fad go bhfuil séasúr na hArdteistiméireachta buailte linn agus faoi lán seoil ag an bpointe seo.

Tréimhse trí seachtaine a bhíonn i gceist gach bliain nuair a bhíonn deis ag daltaí na tíre an t-eolas ar fad a d’fhoghlaim siad a chur i mbun focal.  Thosaigh na scrúduithe ar an 7 Meitheamh agus beidh críoch a chur leo ar an 27 – níl ann ach seachtain amháin eile.

Fós, bíonn comhairle á lorg ag daltaí chun na scrúduithe a shárú.  Is cuimhin le gach duine a n-Ardteist féin ach céard í an chomhairle is fearr ar tugadh duit?  Seo cúpla giota ó dhaoine a rinne an Ardteist le gairid – atá fós beo beathach!

“Tá suim ag gach duine san Ardteist toisc go mbíonn sé ar na meáin ach nuair a théann tú amach sa saol, is beag aird a dtabharfaidh daoine air”

“Tá sé tábhachtach cinnte, ach ní bun agus barr do shaol é ar chorr ar bith”

“Ól neart uisce agus téigh amach ar shiúlóid gach lá”

“Bíonn tú ar ardán na hArdteiste agus bíonn do thuismitheoirí, ghaolta, chairde agus fiú do chomharsana ag iarraidh ceisteanna a chur ort faoi scrúduithe. Arís, ní gá gach rud a scaipeadh le muintir na háite – uaireanta tá sé togha mura ndeir tú rud ar bith.”

Thug Ryan Tubridy comhairle do lucht na hArdteiste cúpla seachtain ó shin trína chuntas Instagram (@instatubridy).  Chruthaigh sé físeán lán le moltaí. Dar leis, is scrúdú é ag deireadh an lae atá ag cur ceisteanna ort chun eolas agus tuiscint a thaispeáint ar pháipéar ach ní léiríonn sé an saghas duine atá ionat. Chuir sé críoch leis an bhfíseán leis an ráiteas seo – “D’fhág an traein as an stáisiún agus tá tú ar an mbóthar chun saoirse a bhaint amach”, smaoineamh atá lán le dóchas agus spreagadh.

Scaip Fiona O’Malley as an gcarthanas meabhairshláinte Turn2Me comhairle iontach freisin in agallamh a rinne sí le The Journal. Mhol sí do dhaltaí a bhfuil trína chéile píosa eolas a chur i gcuimhin dóibh – ‘Ní hé seo an chéad uair a rinne tú scrúduithe.  Bhí tú ag déanamh scrúduithe ar feadh do shaol ar fad agus tá tú lán-ullmhaithe’.

Dúirt sí chomh maith nach minic a mbeidh daoine ag ceistiú éinne faoin Ardteist amuigh i saol na hoibre.

Is í mo thuairim féin gurb í mo chomhairle féin an chomhairle is fearr ar tugadh dom agus mise i mbun na hArdteiste roinnt blianta ó shin.  Is féidir le gach duine neart comhairle a thabhairt do lucht na hArdteiste ach ag deireadh an lae, is iadsan na daoine atá i mbun scrúdaithe agus tuigeann siad an méid gur féidir nó nach féidir leo a dhéanamh.

Go n-éirí an bóthar libh lucht na hArdteiste 2023 agus ná déan dearmad go bhfuil saol eile amach rompu tar éis na hArdteiste.