Saoire in Éirinn: Deireadh Seachtaine i gContae an Chláir agus Árainn
Níor fhág mé Éire ó 2020. *Gasp* Tá an méid san le feiscint inár dtír bheag álainn féin. Áit amháin atá go hálainn ná Contae an Chláir. Cé go bhféadfá seachtainí fada a chaitheamh ann, muna bhfuil ach deireadh seachtaine agat seo chugaibh cúpla moladh.
An Leacht
Baile beag deas is ea é An Leacht (Leacht Uí Chonchubhair mar ab fhearr aithne ar an áit fadó). Tagann scata daoine ar thóir na dtonnta agus tá roinnt mhaith teaghlach ann, agus atmaisféar deas laethanta saoire timpeall.
D’fhanamair in Airbnb, ach dá mbeinnse ag filleadh ar an áit aríst, raghainn ag campáil agus tá fuíollach roghanna ann sa dúthaigh leis sin a dhéanamh, ach é a chur in áirithe roim ré.
Má bhíonn fonn iasc agus sceallóg ort agus tú ar do laethanta saoire cois trá, tá ualach takeaways ach níl áit níos fearr ná Spooneys ar an bPromanáid. Tá an sceaimpí agus sceallóga go diail agus ag €13.50 ní bhrisfidh sé an banc.
Ó thaobh saol na hoíche de sa Leacht, tá rogha mhaith tithe tábhairne ann. Ceol beo chun tosaigh sa bheár agus popcheol maith a chuirfeadh éinne ag rince sa chúlbheár in The 19th agus fuíollach spáis, áiteanna le suí síos, ceol beo ach gan a bheith ró-ard in Satterys.
Theastaigh uainn surfáil a thriail fad is a bhíomar sa Leacht, ach faraor ní raibh oiread is tonn amháin le feiscint ann i gcaitheamh an deireadh seachtaine. Bead ag filleadh ar an áit chun imeacht ag surfáil, cinnte. Muna bhfuil an aimsir agat nó muna bhfuil fonn ort imeacht ag surfáil, is fiú go mór an tsiúlóid cois na trá a dhéanamh agus imeacht ag snámh.
Faigh an bád ó Dhúlainn go hÁrainn
Níl mórán turasanna chomh deas leis an gceann isteach ar an mbád ó Dhúlainn go hÁrainn na Gaillimhe leis an Doolin Ferry Company. Téigh ag a naoi a chlog ar maidin. Beidh sé fuirist spás pairceála a aimsiú, níl ach costas €5 air le haghaidh an lae, agus tá an carrchlós díreach in aice leis an gcé.
Tá an turas fada a dhóthaint ag 45 nóimint (go háirithe má bhíonn duine agaibh sceimhlithe roim an bhfarraige), ach stopann an bád seo chun daoine a bhailiú agus a fhágaint ag Inis Oírr agus Inis Meáin, agus is deas na hoileáin eile a fheiscint.
Istigh ar an oileán, ar an gcéad dream cuairteoirí den lá, tá rogha na rothar agat agus má bhíonn grúpa agaibh ann (agus má bhíonn airgead tirim agaibh), seans go bhfaighdfidh sibh lascaine ar na rothair ó Inis Mór Bike Hire (ar chlé). Muna bhfuil agaibh ach an cárta, is féidir díol leis sin ag Aran Bike Hire (ar dheis).
Is féidir turas bus nó capall is cairt a fháilt leis, agus tá Gaelainn ag an gcuid is mó desna tiománaithe agus is slí ana-dheas é an t-oileán a fheiscint!
Má thá radharcanna aoibhne uaibh is fiú imeacht chomh fada le Dún Aonghasa cois cósta. Tá seans maith go mbeidh scata rónta le feiscint agus is fiú go mór snámh a dhéanamh ag Trá Chill Mhuirbhigh, ar na tránna is deise sa tír, go háirithe ar lá gréine!
Is fiú i gcónaí imeacht chomh fada le Dún Aonghasa agus am a chaitheamh thuas ann. Is siúlóid ciliméadar é ón áit go bhfaightear na ticéidí – costas €3 – agus níl an talamh rómhaith sa chás go mbeadh daoine le glúine dona ann. Seachas sin, is fiú go mór an dún réamhstairiúl agus na radharcanna a fheiscint.
Ina dhiaidh sin, gan dabht, ní féidir Árainn a fhágaint gan imeacht chuig Poll na bPéist! Má bhíonn tú cróga a dhóthaint léimt isteach, is cinnte go mbeidh tú lánsásta leat féin agus ní ligfidh tú d’éinne dearmad a dhéanamh riamh gur dheinis an beart.
Ní raibh an t-am againn stopadh chun piúnt a ól i dTigh Joe Watty ach má bhíonn, faigh ceann ann agus an tarna ceann sa Bar!
Cé gur chóir trí lá a chaitheamh in Árainn chun an áit a fheiscint i gceart, níl a shárú de thuras lae ann!
Tabhair cuairt ar Aillte an Mhothair
Faightear radharc álainn ar Aillte an Mhothair ón mbád farantóireachta ó Dhúlainn, agus is féidir turas ar na hAillte ón bhfarraige a dhéanamh leis an gcomhlacht chéanna (€28 do dhuine fásta). Is féidir an tsiúlóid álainn a dhéanamh, leis, ar bharra na nAillte agus imeacht chomh fada le Ceann Caillí chun an radharc a fheiscint ón dtír, agus cosnóidh sé €12 an duine ort é sin a dhéanamh.
Is féidir turas saghas difriúil a dhéanamh ar na hAillte ó héileacaptar le Adventure001 Ireland. Cosnóidh sé €100 an duine agus deirtear liom go bhfuil sé ana ghairid ach más spéis leat imeacht i héileacaptar, is dócha gur fiú é!
Is iomaí rud eile atá le déanamh i gContae an Bhanner, ach is tosach maith iad na rudaí seo le haghaidh deireadh seachtaine amháin!
