Tá os cionn leath den phobal ó dheas den tuairim gur chóir líon na ndaltaí atá ag fáil oideachas lán-Ghaeilge a mhéadú ó 6.7% go dtí 20% sa 20 bliain amach romhainn.
De réir na pobalbhreithe nua a rinne Ireland Thinks do Chonradh na Gaeilge, tá 53% de dhaoine ó dheas den tuairim gur cheart líon na ndaltaí a fhreastalaíonn ar scoileanna lán-Ghaeilge a mhéadú go dtí 20%.
Níor aontaigh 18% de na daoine a ceistíodh leis an tuairim gur chóir líon na ndaltaí a fhreastalaíonn ar scoileanna lán-Ghaeilge a mhéadú go dtí 20%.
Dúirt Róisín Ní Chinnéide, Bainisteoir Abhcóideachta le Conradh na Gaeilge, gur léir go raibh tacaíocht láidir i measc an phobail d’fhorbairt an ghaeloideachais agus gur chóir don Aire Oideachais agus don Rialtas gníomhú dá réir.
“Tá an pobal ó dheas ar son an líon daltaí ag freastal ar an oideachas lán-Ghaeilge a fhás ó 6.7% go 20% sna fiche bliain amach romhainn. Ní bhainfear é seo amach ach amháin le tacaíocht láidir agus uaillmhianach ón stát agus ón Roinn Oideachais,” arsa Róisín Ní Chinnéide.
“Tá dúshláin ag baint leis an oideachas lán-Ghaeilge a fhás le teacht le mianta an phobail, agus is gá don Aire Oideachais, Norma Foley, plean cuimsitheach a chur le chéile le go mbainfimid a leithéid de spriocanna amach.”
Aithnítear i dtuarascáil a d’fhoilsigh an Roinn Oideachais anuraidh na bearnaí móra sa soláthar gaeloideachais lasmuigh den Ghaeltacht. Dúradh sa tuarascáil chéanna, áfach, gur ar éigean go mbeidh mórán gaelscoileanna nó gaelcholáistí nua á mbunú sna blianta amach romhainn mar go dtiocfaidh laghdú ar bhunú scoileanna go ginearálta mar gheall ar athruithe déimeagrafacha.
Tá feachtas ar siúl ag Conradh na Gaeilge, Gaeilge4All, ar mhaithe le cur le líon na scoileanna lán-Ghaeilge sa stát.
