Triail é cluiche Thonga do na mórchoimhlintí atá le teacht
Beidh Éire ag tabhairt aghaidh ar Thonga ag an deireadh seachtaine agus beidh dúshlán iomlán difriúil ós a gcomhair ná mar a bhí seachtain ó shin. Ba é scóráil pointí an rud ba thábhachtaí an deireadh seachtaine seo caite ach an babhta seo beidh Éire ag iarraidh ceithre úd a scóráil agus bogadh ar aghaidh gan aon imreoirí gortaithe. Beidh siad ag iarradh a bheith cruinn san ionsaí freisin mar is triail í seo do na cluichí móra atá le teacht.
Oireann amchlár an chomórtais don Afraic Theas agus d’Albain beagán níos fearr ná mar a oireann d’Éirinn, ach ní féidir linn gearán a dhéanamh. Thug an cluiche in aghaidh na Rómáine deis dúinn tús maith a chur lenár dturas sa chomórtas agus móiminteam (agus pointí) a thógáil roimh aghaidh a thabhairt ar na foirne níos cumasaí. Tugann an briseadh coicíse idir an cluiche in aghaidh na hAfraice Theas agus an cluiche in aghaidh na hAlban deis d’Éirinn sos maith a ghlacadh agus díriú ar gach ceann de na coimhlintí go hiomlán astu féin.
Tá foireann an-láidir roghnaithe ag Andy Farrell le dul chun páirce i gcoinne Thonga agus sílim gur triail a bheidh ann do chluiche na hAfraice Theas. Freasúra an-fhisiciúil a chuirfidh go leor brú ar Éirinn atá i ndán, agus caithfidh Éire a bheith cruinn sa ruc chun a structúr ionsaithe a cur i bhfeidhm.
Is ábhar iontais é nach mbeidh McCloskey ná O’Brien páirteach mar chreid mé go n-imreodh siad i gceann amháin den dá chluiche tosaigh. Níor shíl mé go n-ainmneodh Éire foireann chomh láidir agus a d’ainmnigh siad don chluiche seo mar gheall ar an mbaol atá ann go ngortófaí duine de na himreoirí. Ní féidir Farrell a cheistiú áfach – ní raibh sé mícheart le fada anois.
Tabharfaidh an Afraic Theas aghaidh ar an Rómáin sa chéad chluiche eile acu agus tá ceithre leathchúlaí clibirte istigh roghnaithe acu san fhoireann. Léiríonn sé seo gurb ionann cuspóir na Spriongboc agus cuspóir na hÉireann an tseachtain seo caite: an oiread pointí agus is féidir a chur ar an scórchlár.
Seans go bhfuil cuma aisteach ar cheithre leathchúlaí clibirte istigh a roghnú ach nuair a smaoiníonn tú ar na línte tacaíochta a ritheann siad agus iad ag ionsaí, tá an-chiall leis. Ritheann siad díreach go dtí an liathróid, is cuma má bhíonn siad chun tosaigh uirthi don chuid is mó den rith. Ciallaíonn sé sin go n-éiríonn leo dul taobh thiar den líne chosanta níos tapúla, agus go mbíonn an t-ionsaí níos fearr dá réir. Más féidir leis an gceathrar acu a bheith ar an bpáirc ag an am céanna, bheadh sé sin taitneamhach.
Gortaíodh Malcolm Marx agus é ag traenáil agus dá thoradh sin níl sé ar fáil don chuid eile den chomórtas. Is caillteanas mór é seo don Afraic Theas agus is post an-speisialaithe é an húcálaí. Níl siad ag tabhairt aon duine eile isteach san fhoireann le cur ina áit agus creidim gurb é is cúis leis sin ná spás a choinneáil oscailte do Handré Pollard, má dhearbhaítear go luath go mbeidh sé aclaí arís.
An éireoidh leis an Afraic Theas níos mó pointí a scóráil ná mar a chláraigh Éire an tseachtain seo caite? Beidh a fhios sin againn oíche Dé Domhnaigh.
