Albaim na Míosa le Ben Ó Faoláin – Márta 2024
Twin Headed Wolf – Altarwise (Féineisithe)
“Is dócha go mbainfimid taitneamh as an dorchadas a chur taobh leis an aoibhneas, sa mhéid is go mbíonn armóiní aoibhne á gcanadh againn agus sinn ag plé le liricí dorcha,” a d’inis Julie Kavanagh dom siar sa bhliain 2014 agus cur síos á dhéanamh aici ar fhuaim Twin Headed Wolf.
Bhí sí féin agus a deirfiúr Branwen tar éis an ghrúpa tíre iarnua-aoisigh a bhunú de thimpiste trí bliana roimhe sin. Cé gur cuireadh tús le taifeadadh amhrán Altarwise in 2013 níl an saothar ach á eisiúint den chéad uair anois.
Rud beag de dheantán cultúrtha atá san albam gleoite seo cheana féin, ní amháin toisc go bhfuil cáil bainte amach ag Branwen leis an ngrúpa iontach Rufous Nightjar (cloisfear a thuilleadh uaim fúthu sin amach anseo) ó shin, ach toisc, leis, gurb é Altarwise an t-aon albam a d’eisigh nó a eiseoidh Twin Headed Wolf riamh.
Tógadh in Iarthar Chontae an Chláir na deirfiúracha Kavanagh agus bhí tionchar mór ag na scothcheoltóirí ar fad a bhí ag maireachtaint sa dúiche orthu. Tá sé sin soiléir le clos ar Altarwise chomh maith le dúil na beirte, mheasfá, i dtraidisiún na mbailéad dúnmharaithe a mheall leithéidí Mark Lanegan, Nick Cave agus Isobel Campbell rompu, agus nós Tom Waits uirlisí ceoil a dhéanamh as a chuid mangarae.
Aimsigh cóip vinile ar Bandcamp sula mbeidh an 250 ar fad imithe!
Grianghraf: Gregory Nolan
Amaro Freitas – Y’Y (Psychic Hotline)
Cé gur beag eolas atá againn ar na traidisiúin cheoil a bhíodh sa Bhrasaíl roimh theacht na bPortaingéalach in earrach na bliana 1500, is éard atá le clos ar Y’Y ná snagcheoltóir Brasaíleach ag iarraidh díchoilíniú a dhéanamh ar a chuid ceoil. Tá srian leis an méid ar féidir le Amaro Freitas a bhaint amach agus an pianó mar a phríomhghléas ceoil aige ach is suaithinseach iad torthaí a iarrachta mar sin féin.
As Recife in iarthuaisceart na Brasaíle é Freitas ach is saothar cumtha in ómós do spioraid agus cultúir na hAmasóine é Y’Y (‘uisce’ nó ‘abhainn’ is ciall le teideal an albaim sa teanga bhundúchasach Mawe). Tugann fuaim mhachnamhach thaobh A an albaim go lár na foraoise ar bhruach na habhna móire sinn. Ar thaobh B druidimid níos cóngaraí don bhfuaim a shamhlaímid le snagcheol, agus aoicheoltóirí éirimiúla mar Jeff Parker (Tortoise), Shabaka Hutchings agus an cláirseoir Brandee Younger mar chomhluadar ag Freitas.
As One – Reflections (Lapsus)
Reflections by Kirk Degiorgio presents As One
Sna blianta 1992-1994 d’eisigh an lipéad ceol leictreonach Warp sraith albam dar teideal Artificial Intelligence, dornán fadcheirníní iontacha ó leithéidí B12, F.U.S.E., Speedy J, Black Dog Productions agus Polygon Window (Aphex Twin). Léamh Eorpach ab ea an ceol a bhí le clos orthu ar cheol teicneo den dara glúin as Detroit, Meiriceá. Ceol leictreonach a dhírigh ar an intinn agus ar na cosa araon.
Ní raibh Reflections le As One (Kirk DeGiorgio) mar chuid den tsraith AI ach, eisithe sa tréimhse chéanna, tá sé ar comhchaighdeán le halbam ar bith a bhí.
Má tá comparáid le déanamh, tá an ceol seo níos cosúla le léirithe séimhe Carl Craig ná rud ar bith eile. Ní sin le rá gur aithris ar stíl Craig ar fad atá i gceist le Reflections. Tá roinnt de sin i gceist ach, le bheith macánta faoi, bhí an bheirt acu ag tarraingt ar an tobar céanna inspioráidí: P-Funk, Motown, luathcheol hip hop agus snagcheol Blue Note na 1960idí.
Athmháistrithe ag lipéad Lapsus na Spáinne, agus an port ‘Priestess’ le fáil ar an leagan vinile den chéad uair, beidh seo ina ábhar spéise daoibhse a aimsíonn suaimhneas na bhflaitheas i bpéire cluasán tar éis lá crua.
Ceoltóirí Éagsúla – DOWN THE LOCAL (Certain Sounds)
DOWN THE LOCAL by Various Artists
Ba iad cordaí sampláilte pianó ‘Unquenchable’ le Deeflux & Miracle a mheall mo chluas i dtreo an chnuasaigh seo d’fhíor rapcheol ar an lipéad Certain Sounds as Reading, Sasana. Ba é imeartas focal na liriceoirí a choimeád ag éisteacht mé.
“The rap world needs a timepiece, here’s a shot, to remind the world of what hip hop forgot,” a rapálann Chrome ar ‘Oovavoo’, ag fógairt gur criú rapálaithe é seo atá ag filleadh ar bhunphrionsabail an cheoil. Greann, geabaireacht agus geáitsíocht. Luach an mheafair agus bleaist den fhunc.
“Raw like a slaughterhouse,” i bhfocail na bhfear uasal féin.
Meril Wubslin – Faire Ça (Bongo Joe)
Ní bhíonn a fhios agam riamh cad atá romham agus albam úr ar lipéad Bongo Joe na hEilvéise tar éis tuirlingt i mo bhosca isteach.
In amanna tá Faire Ça cosúil le bheith ag éisteacht le Tricky ag geabaireacht i bhFraincis (‘Tout est Curieux’). Uaireanta tá sé cosúil le Stereolab ag seinnt a gcuid uirlisí ar leathluas agus iad in ísle brí (‘Grand Espaces’, ‘Un Calme’) nó grúpa ceoltóirí na stíle gnawa ag sleamhnú as radharc isteach i ngaineamh reatha de cheol post-rock (‘L’eau Monte’).
An-chomhluadar ceoil is ea an t-albam seo ach géilleadh don aiteas.
The post Albaim na Míosa le Ben Ó Faoláin – Márta 2024 appeared first on NÓS.
