Beidh páirturú ar an ngrian sa tír seo tráthnóna ó thart ar a 7.55pm nuair a ghabhfas an ghealach sa mbealach ar an ngrian agus beidh sí sa solas orainne mar go gclúdóidh sí idir 20-30% den ghrian agus í ag dul thairsti.
Tá urú iomlán na gréine i Meiriceá ag tarraingt cuid mhór cainte is iontais agus daoine ag súil le spéir ghlan ionas go mbeidh an t-urú iomlán sin le feiceáil go soiléir sna Stáit Aontaithe, i Meicsiceo agus i gCeanada. Tá daoine tar éis taisteal ós na ceithre hairde go dtí na stáit bheaga Maine agus Vermont sna Stáit Aontaithe leis an urú iomlán agus an 20 nóiméad dorchadais a fheiceáil mar go meastar gur glaine a bheidh an spéir sa bhfuacht ansin ná aon áit eile sna Stáit Aontaithe.
Tá an t-iontas seo anocht ag brath go mór ar an aimsir mar lena fheiceáil i gceart caithfidh an spéir a bheith glan mar má bhíonn brat scamall sa spéir, folóidh siad an t-urú.
Ach an spéir a bheith glan, ba cheart go mbeadh an páirturú le feiceáil againn anocht le dul faoi na gréine idir 7.50pm agus 8.50pm, ag brath ar an áit sa tír ina bhfuil duine. Agus an ghealach ag dul thairsti feicimid an t-urú mar scáil ar chuid den ghrian.
Ar an drochuair san oileán seo ar chósta an Atlantaigh, is caol an seans go nochtfar an páirturú dúinn mura n-athróidh cúrsaí aimsire idir seo agus sin mar tá rabhadh buí báistí i bhfeidhm sa tír go dtí meán oíche anocht.
Má bhíonn sé le feiceáil, is ar an gcósta thiar agus i nDún na nGall is fearr a bheidh amharc le fáil ar an urú anocht. Faoin tráth sin den lá beidh an ghrian ar hob dul a luí san iarthar agus is mó den pháirturú a bheidh le feiceáil thiar ná san taobh thoir. Ó tharla 4.2 céim domhanfhaid idir oirthear na tíre seo agus an t-iarthar tá 17 nóiméad idir éirí agus luí na gréine ar an dá thaobh den tír.
Ag brath ar an áit a mbeidh tú le dul faoi na gréine anocht, d’fhéadfadh suas le 55% de thrastomhas na gréine a bheith faoi urú na gealaí agus deir Réalteolaíocht Éireann gur páirturú domhain go maith é sin.
Deirtear linn go bhfuil dóchúlacht 35% ann go bhfeicfear an páirturú i nGaillimh ach Béal an Mhuirthead an áit is fearr le bheith ag breathnú leataobhach ar an spéir, ag 44%. An 29 Márta 2025 a bheidh an chéad pháirturú eile ar an ngrian sa taobh seo domhan.
Is í comhairle na réalteolaithe d’aon duine a shantaíonn an t-iontas nádúrtha seo a fheiceáil dul go dtí áit oscailte éigin óna bhfuil léargas glan ar fhíor na spéire thiar. Garraí nó páirc fhairsing, cnoc a bhfuil a aghaidh siar nó réimse uisce amhail bruach farraige nó locha.
Tá fainic curtha ag Réalteolaíocht Éireann ar dhaoine faoin gcontúirt do na súile a bhaineann le bheith ag stánadh díreach ar an urú agus molann siad do dhaoine gan sin a dhéanamh agus a bheith fíorchúramach na súile a chosaint le spéaclaí gréine.
Bíonn urú ar an ngrian nuair a ghluaiseann an ghealach díreach idir an domhan agus an ghrian, rud a fhágann an domhan seo faoi scáil na gealaí..
Ní bhíonn aon urú ar an ngrian le feiceáil riamh ach i gcuid den phláinéad seo mar níl an ghealach ach an ceathrú cuid d’achar an domhain agus mar sin níl ar a cumas an domhan uilig a chlúdach agus í ag gabháil idir muid agus an ghrian.
