Cad is síniú maith ann i ngort an rugbaí?
Cad is síniú maith ann? An leor don imreoir cabhrú le foireann cluichí a bhuachan? An dteastaíonn uathu an lucht tacaíochta a shásamh le pearsantacht tharraingteach? An gá dóibh glacadh le luachanna na foirne? In aimsir an spóirt ghairmiúil, feicimid imreoirí ag teacht agus ag imeacht ó fhoirne go bliantúil. Tá difríocht mhór déanta ag cuid acu, difríochtaí nach ndearna roinnt eile.
Tháinig John Langford go Cúige Mumhan in 1999 agus bhí sé ag streachailt le meon na foirne a thuiscint. D’athraigh sé dearcadh na foirne maidir lena dtraenáil agus a bheith ina imreoir proifisiúnta. Níl ann ach sampla amháin.
D’inis Donncha O’Callaghan scéal faoi Trevor Halstead ina dhírbheathaisnéis. Tháinig imreoir de chuid na hAfraice Theas, Halstead é féin, go Cúige Mumhan in 2005 nuair a bhí an Cúige ar an mbóthar chun an Corn Heineken a ardú ar deireadh.
Bhí O’Callaghan i seomra aclaíochta lá amháin agus d’iarr sé ar Halstead cabhrú leis má bhí sé ag streachailt. Chabhraigh Halstead, a d’imir i lár na páirce, leis an imreoir dara sraithe idirnáisiúnta. Ina dhiaidh sin, d’fhéach Halstead ar an meáchan a bhí á ardú ag O’Callaghan agus dúirt leis gan ceist a chur air le meáchan chomh héadrom sin a ardú go deo arís.
Chabhraigh an bheirt imreoirí seo leis an meon a athrú i bhfoireann an Chúige ag an am. Ní hé an rud a tharlaíonn ar an teilifís ar an Satharn a théann i bhfeidhm ar fhoireann. Tá na céadta rudaí beaga a tharlaíonn go laethúil a chabhraíonn chun luach an imreora a chinneadh.
Seans nach n-oirfeadh stíl imeartha na foirne do thréithe an imreora. Mar shampla, ní bheadh stíl ionsaithe na Mumhan i láthair na huaire oiriúnach do Uimh. 12 a ritheann díreach. Ciallaíonn sé sin nach bhfeicfeadh an lucht leanúna é sin ach ar lá an chluiche agus go mbunóidís luach an imreora sin ar a chumas imeartha. Go pointe, tá sé sin ceart. Tá an t-imreoir ann chun cabhrú leis an bhfoireann cluichí a bhuachan.
Ach cad faoi thionchar an imreora ar thimpeallacht agus ar chultúr na foirne? Cad mar gheall ar an gcabhair is féidir a thabhairt d’imreoirí níos óige atá ag teacht tríd? Cad faoina léargais ar oiliúint agus ar ullmhú cluichí? Cad mar gheall ar an sampla a léiríonn siad ina n-ullmhúchán agus aclaíocht féin?
Ní shínítear drochimreoirí. Cén fáth a síneofaí iad? Ach, uaireanta, tarlaíonn rudaí. Seans go bhfuil a dteaghlach míshásta ina gceantar nua agus bíonn tionchar aige seo ar an imreoir. B’fhéidir gur mhaith leis an imreoir dul abhaile níos mó ná mar a chéadcheap siad. Tá go leor rudaí éagsúla a d’fhéadfadh dul i bhfeidhm ar fheidhmíocht an imreora ar an bpáirc. Tar éis an tsaoil, níl iontu ach daoine.
Ach ní féidir tionchar an imreora ar an bhfoireann féin a thomhas. Fiú mura bhfuil an lucht leanúna sásta le feidhmíocht imreora ar an bpáirc ní chiallaíonn sé sin nach raibh tionchar mór acu áit éigin eile.
Is minic a bhaineann luach le bua. Is minic nach mbaineann feidhmíocht ach leis an méid a dhéanann imreoir ar an bpáirc. Ach tá níos mó leis ná sin. Go minic is é an rud nach bhfeiceann an lucht leanúna a chinneann luach an imreora. Agus b’fhéidir nach bhfeiceann siad céard a dhéanann an t-imreoir ar an bpáirc ach an oiread!
The post Cad is síniú maith ann i ngort an rugbaí? appeared first on NÓS.
