Déanfaidh grúpa oibre nua atá le bunú ag an Roinn Oideachais scrúdú ar an easpa líofachta sa Ghaeilge i measc cúntóirí riachtanas speisialta.
Léirigh tuarascáil de chuid na Roinne a foilsíodh an tseachtain seo nach bhfuil Gaeilge líofa ach ag duine as gach deichniúr cúntóirí riachtanas speisialta.
Dúirt urlabhraí ón eagraíocht Gaeloideachas gur díol trua é a laghad cúntóirí riachtanas speisialta a bhfuil líofacht acu sa Ghaeilge.
“Tá sé riachtanach go mbeadh an teanga ag cúntóirí atá ag obair i scoileanna lán-Ghaeilge agus Ghaeltachta, agus acu siúd atá ag plé le daltaí agus scoláirí a bhfuil Gaeilge acu sa bhaile, le bheith in ann cúram ceart agus tacaíocht chuí a thabhairt do na daltaí agus dá gcuid oideachais.”
Cé nach bhfuil ceist Gaeilge luaite in aon chor sna pleananna atá leagtha amach sa Tuarascáil faoi Shuirbhé Náisiúnta ar Chúntóirí Riachtanas Speisialta, dúirt urlabhraí ón Roinn Oideachais le Tuairisc go raibh sé i gceist acu aghaidh a thabhairt ar an gceist.
“Tá tús curtha leis an obair ar an gcéad Phlean Forbartha Oibrithe SNA. Tá Grúpa Oibre ar Bhunú Chlár Foghlama agus Forbartha SNA san áireamh sa phlean sin agus scrúdóidh an grúpa sin na riachtanais foghlama atá ag SNA agus riachtanas na Gaeilge san áireamh ansin,” a dúirt urlabhraí na Roinne Oideachais.
Dúirt urlabhraí Gaeloideachas nár mhór a chinntiú go mbeidh sealbhú na Gaeilge mar chuid d’oiliúint na gcúntóirí le dul i mbun oibre i scoileanna.
“Is léiriú eile é seo ar an ngá atá ann le tuilleadh tacaíochta a chur ar fáil do scoileanna lán-Ghaeilge agus Ghaeltachta, agus d’fhoirne na scoileanna sin, le hiad a chumasú le tacú le gach uile dhalta trí mheán na Gaeilge,” a deir urlabhraí Gaeloideachas.
Deir an Roinn Oideachais gurb í an chúis go ndearnadh an suirbhé náisiúnta ar chúntóirí riachtanas speisialta ná eolas a bhailiú faoi na cúntóirí agus faoina gcuid oibre.
“Cuirfidh na sonraí a bailíodh sa suirbhé ar chumas na Roinne Oideachais próifíl iomlán a chruthú de na daoine ar fad atá ag obair mar chúntóirí riachtanas speisialta agus úsáidfear é sin agus cinntí tábhachtacha polasaí á ndéanamh san earnáil, agus san áireamh ansin beidh cinntí faoin oideachas trí mheán na Gaeilge agus teagasc na Gaeilge mar ábhar scoile.”
De réir an Tuarascáil faoi Shuirbhé Náisiúnta ar Chúntóirí Riachtanas Speisialta, an chéad suirbhé náisiúnta riamh a rinne an Roinn Oideachais faoi chúntóirí riachtanas speisialta an stáit, deir 57% díobh nach bhfuil labhairt na Gaeilge go maith acu.
Dúirt 11% nach bhfuil labhairt na Gaeilge ar chor ar bith acu, an céatadán céanna a dúirt go raibh Gaeilge líofa acu.
