Níl iarcheannairí agus bunaitheoirí na nDaonlathaithe Sóisialta, Catherine Murphy agus Róisín Shortall, chun seasamh sa chéad olltoghchán eile.
Bhí an bheirt Teachtaí Dála ina gceannairí ar an bpáirtí a bhunaigh siad in 2015 nó gur tháinig an Teachta Dála as Corcaigh Holly Cairns i gcomharbacht orthu anuraidh.
Dúirt an bheirt iarcheannairí go raibh sé “in am ligean do ghlúin nua a bheith i gceannas” agus gur pribhléid a bhí ann an deis a fháil obair ar son an phobail.
Dúirt Catherine Murphy, Teachta Dála do Chill Dara Thuaidh, go leanfadh sí uirthi ag iarraidh an daonlathas sóisialach a chur chun cinn in Éirinn.
Tá Róisín Shortall ina Teachta Dála i mBaile Átha Cliath le breis is 30 bliain agus thug sí seal ina haire stáit nuair a bhí sí i bPáirtí an Lucht Oibre,
Dúirt ceannaire na nDaonlathaithe Sóisialta Holly Cairns gur “ceannródaithe i bpolaitíocht na hÉireann” ab ea comhbhunaitheoirí an pháirtí. Dúirt Cairns gur “iontach” an méid a bhain siad amach sna blianta fada a bhí tugtha acu i mbun na seirbhíse poiblí.
“Ní bheinnse sa pholaitíocht mura mbeadh cinneadh tógtha ag Catherine agus Róisín na Daonlathaithe Sóisialta a bhunú.
“Spreagadh mór domsa agus do go leor eile a dtiomantas don tseirbhís phoiblí, a gcreideamh gur féidir sochaí níos cothroime a bheith againn agus a ndílseacht iomlán don phrionsabail an daonlathais shóisialta,” arsa Holly Cairns.
