Bronnadh na duaiseanna ag comórtas fiontraíochta do scoileanna Gaeltachta sa Ghaillimh ar dhaltaí a rinne aip nuálach Ghaeilge agus ar dhaltaí a chruthaigh seirbhís a chuireann portráidí de láimh ar fáil atá bunaithe ar ghrianghraif.
Daltaí as Coláiste na Coiribe i gcathair na Gaillimhe agus daltaí as Coláiste Ghobnait, Inis Oírr, a bhí ag ceiliúradh ag an mbabhta ceannais réigiúnach den chomórtas de chuid Údarás na Gaeltachta a bhí ar siúl i Seanscoil Sailearna in Indreabhán.
Rachaidh siadsan ar aghaidh chuig Craobh Náisiúnta Chlár na gComhlachtaí Údarás na Gaeltachta.
Focal Eile is ainm do ghnó dhaltaí Choláiste Ghobnait, Inis Oírr, a chruthaigh aip nuálach a cheadaíonn do dhuine an cluiche ‘Crochadóir’ a imirt trí Ghaeilge ar a fhón póca.
Photraits is ainm do thogra dhaltaí Choláiste na Coiribe a chruthaigh áis a dhéanfaidh portráid de ghrianghraf de dhuine.
Ghlac 750 dalta idirbhliana Gaeltachta, as Corcaigh, Gaillimh, Dún na nGall, Ciarraí, Maigh Eo, an Mhí agus Port Láirge páirt i mbliana i gClár na gComhlachtaí a bhíonn á reáchtáil ag Údarás na Gaeltachta i gcomhar le Junior Achievement Ireland (JAI).
Beidh buaiteoirí chraobh na Gaillimhe in iomaíocht le buaiteoirí na gceantar eile i gCraobh Náisiúnta Chlár na gComhlachtaí a bheidh ar siúl in Óstán Chósta Chonamara ar an 2 Aibreán.
