Tá príomhdhuais Chomórtas Ghlór na nGael 2019 buaite ag Cultúrlann McAdam Ó Fiaich i mBéal Feirste. Fógraíodh an toradh mar chuid d’ócáid speisialta a reáchtáladh ar líne tráthnóna.
Thug lucht na Cultúrlainne, atá lonnaithe ar Bhóthar na bhFál, leo an phríomhdhuais €20,000 agus Trófaí Ghlór na nGael.
D’fhógair Cathaoireach Ghlór na nGael, Pádhraic Ó Ciardha príomhbhuaiteoirí an chomórtais ar chlár speisialta a craoladh inniu ar Facebook Beo i gcuideachta Uachtarán na hÉireann, Micheál D Ó hUigínn.
Agus é ag labhairt mar chuid den ócáid, rinne an tUachtarán comhghairdeachas le Cultúrlann McAdam Ó Fiaich, agus dúirt sé go raibh sé “mar lárionad don phobal agus mar eiseamláir don tír ar fad ar conas ár gcultúr agus ár dteanga a neartú”.
Duaischiste de luach €80,000 san iomlán a bhronntar ag ócáid bhliantúil Ghlór na nGael ar choistí pobail agus cumainn tríú leibhéal, mar aitheantas do ghrúpaí a bhfuil an Ghaeilge á cur chun cinn acu.
Mhol Uachtarán na hÉireann an “díograis” agus an obair atá ar bun ag grúpaí teanga ar fud na tíre.
“Mar Uachtarán na hÉireann bím i dteagmháil leis na mílte daoine fud fad na tíre agus feicim chuile lá toradh bhur n-iarrachtaí ar son na teanga.
“Tá an Ghaeilge beo i ngach réimse de shaol na tíre seo agus cé go bhfuil neart oibre fós le déanamh againn aithním go bhfuil aibíocht tagtha le blianta beaga anuas i measc an daonra i gcoitinne agus an sean-fhrithghaelachas ag cúlú.”
Ar na dreamanna eile a bhuaigh duaiseanna bhí Ionad Naomh Pádraig, Dobhar, contae Dhún na nGall, Coiste Forbartha Charn Tóchair, contae Dhoire agus Cairde Teo, Ard Mhacha.
Is é An Cumann Gaelach, Ollscoil na hÉireann, Gaillimh a bhain an príomhdhuais €3,000 i gcomórtas na gCumann Gaelach sna hInstitiúidí Tríú Leibhéal, duais a bhí urraithe an An Roinn Oideachais agus Scileanna.
