Tá turas 1,300 ciliméadar ar sheanrothar sléibhe curtha i gcrích ag fear óg as an Spidéal an tseachtain seo.
Naoi lá a chaith Brian Ó Finneadha, as Baile Liam sa Spidéal, ag gabháil don turas rothaíochta óna bhaile Gaeltachta go dtí Páras na Fraince.
In ómós dá athair, Brian, a bhásaigh go tobann de bharr taom croí ag deireadh na bliana seo caite, a bheartaigh an rothaí óg an turas a dhéanamh agus airgead á bhailiú aige don charthanacht ‘Croí’.
Ag a 7am Dé Sathairn an 8 Lúnasa, a thug Ó Finneadha faoin turas ó Ghaillimh go Baile Átha Cliath, áit a bhfuair sé an bád go Caergybi (Holyhead) na Breataine Bige agus uaidh sin go Shrewsbury.
Dúirt Ó Finneadha le Tuairisc.ie gur i Sasana a sháraigh sé “an chuid ba dheacra” den turas. Fuair sé “drochscaladh ón ngrian” ar a bhealach go Birmingham agus chuir “na stoirmeacha toirní agus an bháisteach throm” moill ar a thuras go Crawley, ó dheas de Londain.
Ó Dover, fuair sé an bád go Calais na Fraince agus ar aghaidh leis go cathair Amiens, sular shroich sé a cheann scríbe, An Túr Eiffel i bPáras oíche Dé Luain ag a 7pm.
Dúirt Ó Finneadha gur chaith sé “trí mhí chrua” i mbun traenála le hullmhú don dúshlán rothaíochta.
“Bhí mé ag déanamh rudaí aisteacha. Théinn ar an rothar ón mbaile go Cruach Phádraig i Maigh Eo, dhreapfainn go dtí barr na cruaiche agus d’fhillinn abhaile ar an rothar arís an lá céanna. Bhí sé tough ach b’fhiú é.”
Thug Ó Finneadha faoin turas ina aonar ar sheanrothar sléibhe, a bhfuil “seanchleachtadh” aige air, agus ceol Christy Moore “mar chomhluadar” aige ar a bhealach.
Bhí deacracht amháin aige leis an rothar in Caergybi ach thug fear a bhí ag obair in óstán ansin lámh chúnta dó leis an rothar a dheisiú.
Dúirt Ó Finneadha go raibh sé “an-sásta” gur éirigh leis an turas a chríochnú i ndiaidh dó an turas a chur siar de bharr na paindéime.
Cé nach molann Ó Finneadha do dhaoine a bheith ag taisteal “go minic” in aimsir seo an choróinvíris, dúirt sé nach raibh sé “ródhona” toisc “daoine a bheith cúramach” agus “mascanna aghaidhe á gcaitheamh ag cách”.
Tar éis bás tobann a athar a smaoinigh sé ar dtús tabhairt faoin aistear carthanachta seo.
“Bhí mé ag caint faoin turas seo a dhéanamh agus gan m’athair ach imithe cúpla lá, mar sin bhí orm é a dhéanamh,” a dúirt Brian Ó Finneadha.
Tá breis agus €6,000 bailithe ag Ó Finneadha ar son na carthanachta Croí go dtí seo. Is féidir síntiús a thabhairt dó anseo.
