Tá an scríbhneoir agus drámádóir aitheanta Eugene McCabe tar éis bháis. Bhí sé 90 bliain d’aois.
Áirítear an scríbhneoir a rugadh i nGlaschú i 1930 ach a d’aistrigh go hÉirinn lena mhuintir sna 1940idí, ar dhuine de mháistrí próis na tíre seo.
Dúirt an t-úrscéalaí Colm Tóibín faoi, ‘Ní sholáthraíonn Eugene McCabe ach sárshaothair’.
Ar na saothair is mó a thuill cáil dó bhí an dráma King of the Castle agus Cancer, Heritage agus Siege a thriológ de dhrámaí teilifíse faoi na Trioblóidí a craoladh ar RTÉ i 1973.
Tá an t-aon úrscéal leis Death and Nightingales, a foilsíodh in 1992, áirithe ar cheann de sheoda litríocht na hÉireann. Thuill Christ in the Fields, a chnuasach scéalta bunaithe ar na drámaí teilifíse ardmholadh chomh maith.
I 1999 foilsíodh Tales From The Poorhouse, ceithre mhonalóg leis faoin nGorta Mór. D’aistrigh Liam Mac Con Iomaire an saothar sin go Gaeilge agus craoladh leagan teilifíse de Scéalta Ó Theach na mBocht ar TG4 a raibh na príomhpháirteanna ann ag Brendan Gleeson, Mick Lally agus Ruth McCabe, iníon Eugene féin.
A phrós lom fileata agus an ionramháil mhacánta ealaíonta a rinne sé ar chás na ndaoine i gceantar na teorann agus ar cheisteanna amhail an seicteachas is mó a thuill moladh do McCabe mar scríbhneoir den chéad scoth.
Bhuaigh sé iliomad duaiseanna náisiúnta agus idirnáisiúnta agus ba bhall d’Aosdána é.
Maireann a bhean Margot, agus a leanaí Ruth, Marcus, Patrick agus Stephen.
