5 chlár Nollag as gach cearn den domhan
Cá háit a mbeimis uile i mbliana gan Netflix nó seirbhísí eile sruthaithe? Agus neart ama sa bhaile ag an gcuid is mó againn in 2020, ní raibh bliain ab oiriúnaí don bhingeáil. Ní rabhamar in ann dul amach agus ár gcuimhní féin a chruthú, ach cuimhneoimid ar fad ar Joe Exotic agus a chairde go deo.
Mar sin, críochnaímis an bhliain ar an gcaoi chéanna: le liosta de na cláir Nollag is fearr atá ar fáil ar Netflix faoi láthair. Mar gheall go bhfuilimid ar fad aontaithe i gcoinne COVID-19 timpeall an domhain, ní mór dúinn sraitheanna agus cláir idirnáisiúnta a roghnú.
Hjem til jul (Home For Christmas) – An Iorua
Seans maith ann go bhfaca tú fógraí don chlár seo ar Netflix cheana. Rogha iontach don Nollaig, go háirithe do dhaoine a baineann an-taitneamh as rom-coms, is clár greannmhar é seo faoi grá san 21ú hAois.
Insítear sa tsraith scéal Johanne agus í ag lorg fir don Nollaig, ionas go stadfaidh a mhuintir de bheith ag spochadh aisti. Tá dhá shéasúr ar fáil faoi láthair, mar sin seo rogha mhaith má tá an deireadh seachtaine saor agat roimh thús shaol oibre 2021.
Zeit der Geheimnisse (Holiday Secrets) – An Ghearmáin
Beagáinín níos dáiríre mar scéal, leanann an sraith bheag seo teaghlach Gearmánach agus na deacrachtaí eatarthu thar thrí ghlúin. Suite i teach saoire cois farraige, foghlaimíonn na carachtair rúin éagsúla le linn an Nollag.
Tá ach trí eachtra i gceist, gearr go leor le críochnú ar Lá Caille agus ceapairí liamháis agus turcaí á n-ithe agat. Moltaim é do dhaoine atá ag lorg ábhair níos aibí óna cláir Nollag
How to Ruin Christmas: The Wedding – an Afraic Theas
Is rogha beagáinín aisteach é seo mar, cé go bhfuil ‘Nollaig’ sa teideal, níl mórán den Nollaig le fheiceáil. Leanann an tsraith seo Tumi, agus í ag taistil ó Cape Cod go Johannesburg do bainis a deirféar, a bheidh ar siúl ar an 25 Nollaig.
Má tá tú tinn tuirseach de mheáin Nollag lán sneachta agus bronntanas, molaim an tsraith gheal ghreannmhar seo mar leigheas.
Dash & Lily – Stáit Aontaithe Mheiriceá
Tá sé beagnach dohdhéanta aon liosta faoin Nollaig a scríobh gan clár amháin ó Mheiriceá a chur san áireamh. Don liosta seo, níl mé ach ag moladh Dash & Lily, clár nua Netflix faoin gcaidreamh idir beirt óg in New York.
Is rogha mhaith é seo don teaghlach ar fad, atá bunaithe ar shraith leabhar do páistí agus déagóirí. Níl ach ocht eipeasóid i gceist, chomh maith, foirfe do na hoícheanta dorcha idir dhá Nollaig.
アグレッシブ烈子 (Aggretsuko: We Wish You a Metal Christmas) – An tSeapáin
Ní sraith cheart Nollag atá i gceist anseo, ach eagrán speisialta don Nollaig. Mura raibh aithne agat cheana ar Aggrestsuko, is áit mhaith é seo le tosú. Cruthaithe ag Sanrio, an comhlacht céanna taobh thiar de Hello Kitty, tá Aggretsuko i bhfad níos aibí ná mar a cheapfá.
Le linn an lae, oibríonn Retsuko bheag in oifig leadránach. Ach, san oíche, ligeann sí amach a chuid frustrachais ag canadh ceol miotail throm sa bheár cáirióice. Spraíúil, greannmhar agus i bhfad rófíor, tá Aggretsuko: We Wish You a Metal Christmas foirfe do gach duine atá réidh le screadaíl tar éis uafás 2020.
