Súil siar ar Shéasúr na gCúigí
Agus an séasúr na gcúigí críochnaithe, conas a d’éirigh leo i rith na bliana agus céard atá orthu a dhéanamh don bhliain seo chugainn?
Connachta
Ní raibh séasúr maith ag Connachta i mbliana agus cé gur shroich siad an babhta díbeartha den Chorn Seaimpíní, sprioc a bhí acu ag tús an chomórtais, níor bhuaigh siad ach aon chluiche amháin sa chomórtas sin ar an iomlán.
Ní raibh taispeántais níos fearr acu san URC ach an oiread. Chríochnaigh siad san 11ú áit, rud a chiallaíonn nach mbeidh siad ag imirt sa Chorn Seaimpíní an bhliain seo chugainn. Ar an iomlán, níor bhuaigh siad ach deich gcluiche, staitistic nach gcuirfidh áthas ar leantóir ar bith. Bhí deacrachtaí acu sa cheathrú deireanach de chluichí, rud a bheidh orthu caoi a chur air sa chéad shéasúr eile.
Ach tá roinnt imreoirí nua ag teacht isteach san fhoireann i rith an tsamhraidh agus beidh siad ag imirt sa Challenge Cup; ceapaim go mbeidh siad in ann déileáil le sin níos fearr.
Mumha
Tús maith, leath na hoibre, ach ní sa chás seo. Bhí tús iontach maith ag Mumhain; bhuaigh siad ceithre chluiche in aghaidh a chéile agus bhuaigh siad dhá chluiche dhéag as an gcéad cúig chluiche dhéag.
Sin deireadh leis ó thaobh Mumhan de, áfach. Chaill siad seacht gcluiche as an chéad aon chluiche dhéag ina dhiaidh sin agus chríochnaigh siad an séasúr, ceann a thosaigh le go leor féidearthachtaí, gan chorn.
Tá orthu caoi a chur ar an gclibirt agus stíl imeartha leanúnach a thabhairt isteach. Ba cheart go n-imreodh na himreoirí is fearr in áit na n-ainmneacha is mó freisin. Tá bainistíocht beagnach iomlán nua ag teacht isteach agus beidh siad ag iarradh a stampa féin a chur ar an ionsaí agus an chosaint.
Laighin
Ní bheidh imreoirí nó bainistíocht Laighean sásta leis an séasúr seo. Shroich siad an babhta ceannais den Chorn Seaimpíní agus an babhta leathcheannais den URC, ach níor bhuaigh siad corn ar bith agus sin an fáth nach mbeidh siad sásta.
Bhí babhtaí iontacha acu i rith na bliana. Bhuaigh siad 17/21 de chluichí ach, sna hocht gcluiche deireanach, níor bhuaigh siad ach ceithre cinn.
Tá obair le déanamh acu don séasúr le teacht. Caithfidh siad teacht aníos le bealach chun imirt in aghaidh na bhfoirne móra. Cabhróidh Jason Jenkins le sin agus tá forbairt Joe McCarthy ag dul go maith freisin. Idir an bheirt acu, James Ryan, agus Ross Moloney, gan trácht a dhéanamh ar an gcuid eile den phaca, beidh na himreoirí téagartha acu chun é sin a dhéanamh.
Ulaidh
Cé nár bhuaigh siad aon rud i mbliana, bhí séasúr an-mhaith ag Ulaidh. Tá Ulaidh ag forbairt le roinnt blianta anuas agus lean siad orthu arís i mbliana. Chaill siad dhá chluiche móra (ar nós Laighin) ach tá siad céim níos cóngaraí ag druidim i dtreo an chéad shéasúr eile.
Rinne an lucht bainistíochta go leor obair mhaith ó thaobh conarthaí imreoirí freisin agus tá príomhbhainisteoir Dan McFarland ag fanacht leis an gcúige go dtí 2025. As gach aon chonradh a rinneadh, is dóigh gurb é sin an ceann is tábhachtaí. Is é McFarland an duine atá ag stiúradh na foirne sa treo ceart.
Ná bíodh ionadh ort má bhuann Ulaidh corn de shaghas éigin an bhliain seo chugainn. Tá siad ag tógáil foirne an-láidir le cúpla bliain anuas (b’fhéidir go bhfuil siad fós róspléach ar imreoir nó dhó) ach cinnte tá siad ag druidim i dtreo teidil faoi stiúir McFarland.
