Plúr na gceoltóirí Gaeilge le seinm ag Féile na Gealaí
Beidh scoth an cheoil Gaeilge le cluinstin ag “féile champála na nGael” i Ráth Chairn Ghlas na Mí ar an 7-9 Meitheamh. Tabharfaidh Féile na Gealaí 2024 ardán do cheoltóirí fadbhunaithe agus do cheolóirí úra comhaimseartha i saol na Gaeilge (agus Gàidhlig!), a fhreastalóidh ar gach sórt duine a bhfuil dúil sa cheol acu. Cluinfear leithéidí Jiggy, The Bonny Men, Super Céilí, The Shan Vans, Cuas agus Grooveline ar an stáitse idir oíche Aoine agus deireadh na seachtaine.
Seolfaidh The Hot Toddies an fhéile tráthnóna Aoine an 7 Meitheamh le cur i láthair bríomhar agus leanfar leis an chraic le Cuas as Corca Dhuibhne, Grooveline agus an grúpa lán fuinnimh lán spleodair as Baile Átha Cliath, The Bonny Men. Tabharfaidh Super Céilí faoi ardán an chlub áitiúil, An Bradán Feasa, le manglam ceoil a tharraingíonn ar an stíl thraidisiúnta agus ar an cheol pop-leictreonach.
Dé Sathairn an 8 Meitheamh beidh manglam eile ann agus Clann Mhic Corraidh as Béal Feirste ag canadh leo ach ní stopfaidh sé ansin óir beidh Na Fíréin ag tabhairt faoi cheolchoirm eisiach a dhéanfaidh ceiliúradh ar 40 bliain ó chéadchas siad i Ráth Chairn.
Ag tógáil ar an fhuinneamh sin beidh an grúpa misteach leictreonach Huartan agus an banna indie The Shan Vans as Béal Feirste faoi shoilse an ardáin. Ina dhiaidh sin beidh an rapálaí Torby chomh maith leis an rinceoir is amhránaí as Gaedhaltacht na hAlban, Joy Dunlop lena banna ceoil úr.
Deir príomhamhránaí ó The Shan Vans, Conchuir Mac Siacais, “Tá muid ar tí ár dtríú singil ‘An tSeanbhean’ a láinseáil an samhradh seo le hamhrán agus físeán ceoil le baicle d’ealaíontóirí Éireannacha agus Palaistíneacha amhail Tadhg Hickey, Talha Wise Wolf, St. Diabhal agus níos mó. Tá The Shan Vans ag dúil go mór le raic a thógáil ar stáitse lasmuigh de Bhéal Feirste den chéad uair ó Picnic Leictreach 2023.”
Chun clabhsúr a chur ar imeachtaí na páirce beidh an t-ollghrúpa Jiggy ann sula “ndéanfar oilithreacht go dtí’n Bradán Feasa chuig club na féile” a deir eagraithe na féile.
Tá togra úr ceol trad-leictreonach á reáchtáil ag Féile na Gealaí i mbliana, is é sin Cigire na bPuntaí. Deir an fhéile “go mbeidh croí na féile, Joe Jack Attack, ar na bonnaí chun deireadh a chur le féile 2024 – ná cailligí seo ar ór nó ar airgead!”
Beidh clár an típí lán le himeachtaí ar an tSatharn fosta. Ióga le ceol chun an tinneas póite a leigheas, rang dornaclaíochta mar thógáil fuinnimh, filíocht fhísiúil IMRAM leis an intinn a mhúscailt agus podchraoladh beo leis na Gael Gals.
Léireoidh an fuirseoir fíorChorcaíoch Tadhg Hickey seó grinn sa típí agus beidh ceiliúradh BRÓD le Sexy Tadhg (Ó Grifín) agus Aerach Aiteach Gaelach ag titim amach ina dhiaidh.
Ní fhágfaidh an fhéile na teaghlaigh i ndearmad ach oiread. Beidh seisiún scéalaíochta i Leabharlann Ráth Chairn, Sorcas Fanzini sa Halla Pobail, agus seó ceoil Draíocht an Dúlra le Gráinne Holland agus a cuid cairde i measc roinnt rudaí eile. Tar éis sin ar fad pillfidh Oireachtas na Gealaí ar chúl tí an Bhradán Feasa oíche Shathairn.
Tá ticéid Sraith 2 ar díol ar €110 go dtí an 22 Bealtaine agus díolfar ticéid Sraith 3 agus ticéid deireadh seachtaine ar €150 ón 23 Bealtaine ar aghaidh. Díolfar líon teoranta ticéid lae ar €80 le linn Sraith 3 chomh maith le pasanna teaghlaigh idir €15-€30 a thabharfaidh cead do theaghlaigh a bheith ar an láthair go 19:00.
Soláthróidh P.I.M.T Pizza, The Flavour Smyth agus eile bia ar an láthair. Is féidir tuilleadh eolais a fháil ar na meáin shóisialta nó ar shuíomh idirlín Féile na Gealaí.
The post Plúr na gceoltóirí Gaeilge le seinm ag Féile na Gealaí appeared first on NÓS.
