Ceol, comhrá agus ceardlanna sorcais ag Féile an Earagail
Tá clár mór millteach imeachtaí leagtha amach d’Fhéile Ealaíne an Earagail a bheidh ar bun ó 13-18 Iúil ag ionaid éagsúla ar fud chontae Dhún na nGall.
Ar an Domhnach, an 14 Iúil ag a 8pm beidh The Social sna Doirí Beaga mar láthair do cheolchoirm leis na grúpaí Huartan, Trá Pháidín agus Róis. Meascán den cheol traidisiúnta agus ceol comhaimseartha a bheidh anseo leis an mbuíon cheoil a bhuaigh an gradam nua i gcuimhne ar Rónán Mac Aodha Bhuí ag Gradaim Cheoil Nós na bliana seo. Banna ‘traidtreonaice’ iad Huartan agus triúr ceoltóirí traidisiúnta páirteach ann, Catriona Ní Ghribín, Múlú agus an léiritheoir Stiofán Loughran.
Cead isteach €15 agus ticéid anseo.
Ar an Mháirt beidh ócáid Pop-up Gaeltacht in Blake’s Bar i Leitir Ceanainn agus seisiún ceoil ar bun le Comhaltas Leitir Ceanainn agus Líonra Leitir Ceanainn. Ócáid saor in aisce í seo ag a mbeidh ceol beo, caint agus spraoi.
Gabhfaidh an fhéile go Toraigh ar an Aoine, an 19 Iúil, ag a 7pm agus Oíche Chultúir agus Oidhreachta á cur ar bun in An Club. Níl aon táille ar an doras don ócáid seo mar a ndéanfar oidhreacht ealaíne Thoraí a cheiliúradh.
Ar an Domhnach, an 21 Iúil, ag a 8pm in Ionad Cultúrtha Réigiúnach (Regional Cultural Centre) Leitir Ceanainn beidh ceolchoirm le tríréad Eoghain Uí Cheannabháin agus Mhuireann Nic Amhlaoibh.
Ticéid ar €25 ar fáil anseo.
Éalaigh leis an sorcas
D’aon duine a raibh fonn orthu riamh éalú leis an sorcas tá an deis acu anois agus ceardlanna i scileanna sorcais á gcur ar fáil sa Phuball Mór ag ionad an CPI i gCaisleán na Finne agus i Machaire Gathlán, Doirí Beaga.
Cuirfear ceardlanna ar bun do pháistí idir 7 agus 11 bliain d’aois agus múinfear scileanna sorcais is cleasghleacaíochta [acrabataic] go spraíúil dóibh. Cuirfear na seisiúin ar bun i gCaisleán na Finne ó 18-20 Iúil agus sna Doirí Beaga ón 25-27 Iúil.
Ticéid ar fáil anseo.
Fleá na bPrátaí i nGleann na Sceiche
Cé go raibh séasúr crua ag feirmeoirí fataí i mbliana, níl aon ísle brí ar lucht eagraithe ‘Fleá na bPrátaí’ agus ceiliúradh mór le bheith acu i nGleann na Sceiche ar an Eachréidh deireadh seachtaine saoire bainc an 2-4 Lúnasa.
Is é seo an 24ú bliain ag an bhféile seo a dhéanann ceiliúradh ar an bpráta le linn trí lá na féile. Beidh amhránaíocht agus ceol ar an gclár chomh maith le scéalaíocht, garraíodóireacht, agus tá rogha gach bia agus togha gach dí geallta ag an lucht eagraithe freisin.
Tháinig ráiteas an tseachtain seo ó ‘Uachtarán Phoblacht na bPrátaí’ ag cur fáilte Uí Bhaoill roimh uasal is íseal go féile na bliana seo. Tá sé d’aidhm acu i ‘bPoblacht na bPrátaí’, de réir an ráitis, fáilte a chur roimh gach uile phráta beag is mór go dtí an fhéile.
Ainneoin na drochaimsire a chuir isteach ar shéasúr curaíochta an Earraigh in Éirinn agus ar fud na hEorpa i mbliana, tá an chuma ar an scéal go bhfuil ag éirí go maith leis na hiomairí i Gleann na Sceiche. Deir lucht eagraithe na féile go bhfuil na fataí fiche lá faoi bhláth anois agus níl uathu anois ach fiche lá ag fás go mbeidh siad réir le baint.
Dorn san Aer do Rónán Mac Aodha Bhuí
Tá féile nua, Dorn san Aer, bunaithe in ómós don sárchraoltóir aitheanta Rónán Mac Aodha Bhuí.
Beidh an fhéile cheoil, atá á heagrú ag cairde agus muintir Rónáin Mhic Aodha Bhuí, i dteannta ceoltóirí a spreag sé agus ar chuidigh sé leo i rith na mblianta, ar siúl i nGaoth Dobhair i nGaeltacht Dhún na nGall i mí Mheán Fómhair seo chugainn.
Agus an fhéile á fógairt, dúirt lucht eagraithe na féile Dorn San Aer gur mian leo ‘an splanc a las Rónán a choinneáil beo’.
Léigh alt faoin fhéile le Méabh Ní Thuathaláin anseo.
Ar an Dé Deiridh – dráma nua ar stáitse i gConamara agus Inis Oírr
Tá dráma nua, Ar an Dé Deiridh, atá bunaithe ar sheanchas agus stair Chonamara, ag dul ar camchuairt i lár mhí Iúil i gConamara agus in Inis Oírr. Is é an grúpa ealaíontóirí as Conamara, Gliogar, atá á léiriú agus Caoimhghín Ó hEoghasa sa bpríomhpháirt.
Insítear scéal Éamoin Choséadrom in Ar An Dé Deiridh, teachtaire i bhfórsaí armtha chlann Uí Fhlaithbheartaigh in Iar-Chonnachta in 1256 AD. Maraítear deartháir Éamoin le linn catha ina n-éiríonn le fórsaí Normannacha Walter de Búrca in aghaidh Chlann Uí Fhlaithbheartaigh. Tugann Éamon do na boinn é as Maigh Cuilinn chomh fad le hInis Mhic Ádhaimh, nó an Cheathrú Rua mar a thugtar air sa lá atá inniu. Tá sé ag iarraidh fainic a chur ar a mhuintir faoin réabadh atá ar an mbealach. Céard a thabharfaidh slán iad?
Is iad dátaí na camchuairte: an 16 Iúil, Áras Éanna, Inis Oírr; an 18 Iúil, Seanscoil Sailearna, Indreabhán, an 24 Iúil, Áras Pobail Chorr na Móna.
Tosóidh gach léiriú ag 8pm, agus tá ticéid €5 ar fáil anseo.
Síneadh ama curtha le comórtais liteartha Oireachtas na Gaeilge
Tá seachtain bhreise fógartha do scríbhneoirí Gaeilge le cur isteach ar
Chomórtais Liteartha an Oireachtais 2024. D’fhógair Oireachtas na Gaeilge an tseachtain seo go mbeidh am sa bhreis á thabhairt do scríbhneoirí chun snas a chur ar a gcuid saothar sula gcuirfidh siad isteach ar na comórtais liteartha iad. Glacfar le hiarratais anois suas go dtí an 8 Iúil 2024.
Tá réimse leathan comórtas i gceist ar chlár na gComórtas Liteartha i mbliana, ina measc: úrscéal, gearrscéal, ficsean d’fhoghlaimeoirí fásta, prós, filíocht, iriseoireacht, greannán, drámaíocht agus eile. Duaischiste os cionn €30,000 a bheidh ann.
Tuilleadh eolais anseo.
Ceardlann ealaíne dhátheangach i gCaisleán an Bharraigh
Beidh ceardlann ealaíne dhátheangach á cur ar bun ag an ealaíontóir Miriam Byrne in Ionad Ealaíne an Linenhall i gCaisleán an Bharraigh ar an Aoine, an 12 Iúil ag a 11:00pm. Ceardlann ar an gcolláis a bheidh ann agus is trí Ghaeilge agus trí Bhéarla a bheidh an cheardlann á rith. Beidh fáilte ag an lucht eagraithe roimh dhaoine beag beann ar an leibhéal Gaeilge atá acu.
Is ealaíontóir í Miriam Byrne a oibríonn le péint agus leis an dealbhadóireacht agus atá ina cónaí in Acaill. Is minic a bhaineann sí úsáid as an athchúrsáil ina cuid oibre, tógann sí seanrudaí agus rudaí atá caite amach agus cruthaíonn sí saothair ealaíne astu. Tírdhreach iarthar na hÉireann agus an fharraige a bhíonn mar inspioráid aici.
Ticéid ar €5 ar fáil anseo.
