Comórtais Liteartha an Oireachtais 2024

Comórtas Siamsaíocht Agus Ealaín Feabhra 14th, 2024 | fionnuala 
Táimid anois ag glacadh le hiontrálacha do na Comórtais Liteartha 2024! Tríocha a dó (32) comórtas atá ar chlár na bliana seo – ocht déag (18) acu sin dírithe ar scríbhneoirí fásta agus ceithre déag (14) dírithe ar scríbhneoirí óga. Tá réimse leathan seánraí i gceist ar an siollabas comórtais, iad seo ina measc: úrscéal, gearrscéal, ficsean d'fhoghlaimeoirí fásta, prós, filíocht, iriseoireacht, greannán, drámaíocht agus eile.

I measc na gcomórtas nua atá ar an chlár i mbliana, tá comórtas iriseoireachta do dhaoine fásta faoi 30 bliain d’aois, urraithe ag NÓS. Is í aidhm an chomórtais ná scríbhneoirí óga úra a mhealladh le dul i mbun pinn agus mar aon le duais airgid, beidh an saothar buacach foilsithe ar shuíomh NÓS, (irisleabhar ar líne). Tá comórtais do scríbhneoirí óga briste síos ina trí chuid - bunscoil; meánscoil & coláistí tríú leibhéil. Mar aon leis na comórtais greannáin do dhaltaí bunscoile, tá comórtais próis, iriseoireachta, ficsin agus filíochta ann do dhaltaí meánscoile agus do mhic léinn fochéime.

Tá na Comórtais Liteartha mar chuid lárnach d'obair an Oireachtais ó bunaíodh é in 1897 agus é mar aidhm acu: deiseanna a chur ar fáil don ghréasán scríbhneoirí Gaeilge ar fud an domhan; litríocht agus nua-scríbhneoireacht na Gaeilge a chur chun cinn; agus scríbhneoirí óga nua a mhealladh le dul i mbun pinn. Cuirtear duaischiste ar fáil do gach comórtas agus níos tábhachtaí fós, cuireann an painéal moltóirí aiseolas luachmhar ar fáil do gach scríbhneoir ar a gcuid saothar – aiseolas a chabhraíonn le forbairt, bláthú agus scileanna scríbhneoireachta na scríbhneoirí.

Is féidir iarratas a chur isteach ar líne ANSEO nó is féidir cóip den fhoirm iarratais a fháil ó Oifig an Oireachtais agus í a sheoladh chuig: Comórtais Liteartha an Oireachtais, 6 Sráid Fhearchair, Baile Átha Cliath 2.

Spriocdháta Iontrála: 1 Iúil 2024.

Is féidir éisteacht le rogha Bhuaiteoirí Chomórtais Liteartha an Oireachtais thar na mblianta ar ár bpodchraoladh, Seoda ón Taisce Liteartha, anseo!