Tá 465 cás nua den Covid-19 fógartha ag an Roinn Sláinte tráthnóna.
84 othar Covid-19 a bhí sna hospidéil agus 30 díobhsan a bhí in aonad dianchúraim.
Bhí dóchas le brath i gcaint Phríomhfheidhmeannach an HSE Paul Reid inniu agus é ag rá go bhfuilimid “i bhfad ó laethanta dorcha mhí Eanáir” agus é ag tuar “laethanta níos gile i ndán dúinn”.
Údar dóchais do Reid gur 80 duine a bhí in ospidéil na tíre ag Covid-19 ar maidin inniu, feabhas mór ar an 2000 duine a bhí sna hospidéil ag an víreas ag tús na bliana.
D’fhógair Feidhmeannacht na Seirbhíse Sláinte go raibh 2.9 milliún dáileog de vacsaíní in aghaidh an Covid-19 tugtha amach sa tír seo faoin tráth seo. Tá an chéad snáthaid faighte ag thart ar 53% de dhaoine fásta na tíre agus tá an dara snáthaid faighte ag duine as gach ceathrar díobh sin. Tá rún ag an HSE an tsnáthaid a thabhairt do idir 280,000 agus 300,000 duine an tseachtain seo.
Dúirt Paul Reid go raibh an-ghlacadh leis an vacsaín ag pobal na tíre seo, “údar éada ag mórán tíortha”. Dúirt Reid gur ghlac suas le 99% de na daoine a bhfuil na ceithre scór sáraithe acu an vacsaín, 95% díobh sin idir 70-79, agus os cionn 90% de na daoine idir 60-69.
Dúirt sé go raibh an chomhairle is déanaí ón gCoiste Comhairleach Náisiúnta Imdhíonta (NIAC) go laghdófaí an tréimhse idir an dá shnáthaid den AstraZeneca ó 12 seachtain go dtí 8 seachtaine á meas ag an HSE. Dúirt an Príomhfheidhmeannach go mbeadh impleachtaí athrú dá réir soiléir sna laethanta beaga seo ach go raibh “cinneadh mar sin ag brath go mór ar an soláthar vacsaíní ó AstraZeneca a dheimhneofar sna seachtaine beaga seo”.
“Déanfaimid moladh don Aire faoin gcur chuige a bheidh againn go luath ach a mbeidh an anailís agus an measúnú sin déanta againn,” a dúirt sé.
Dúirt Príomhoifigeach Leighis na Roinne Sláinte, an Dr Tony Holohan go meastar anois go mbíonn imdhíonacht in aghaidh an ghalair ar feadh naoi mí ag aon duine a tholg an Covid-19. Go dtí seo ceapadh gur sé mhí imdhíonachta a bhí ag duine agus le tuilleadh fianaise, d’fhéadfadh gur dhá mhí dhéag imdhíonachta a bheifí a ghealladh do dhuine amach anseo.
D’fhógair Roinn Sláinte Thuaisceart Éireann inniu go raibh duine amháin eile básaithe ansin de dheasca an víris. 80 cás nua a deimhníodh.
17 othar Covid-19 atá in ospidéil an Tuaiscirt agus tá duine amháin acusan in aonad dianchúraim.
Tá an chéad dáileog den vacsaín faighte ag 1,073,775 duine sa Tuaisceart agus tá an dara dáileog faighte ag 684,398.
Ar a laghad 7,091 duine atá básaithe in Éirinn go dtí seo de dheasca na paindéime, 2,154 duine ó thuaidh den teorainn agus 4,937 duine ó dheas di.
384,100 cás a deimhníodh go nuige seo in Éirinn, 261,205 cás ó dheas den teorainn agus 122,895 cás ó thuaidh di.
