‘Caithfidh fisiciúlacht an rugbaí titim laistigh de dhlíthe an spóirt’
I rith cluiche Laighean san RDS an deireadh seachtaine seo caite, gortaíodh Ryan Baird go dona nuair a thit sé ar an talamh agus tháinig imreoir eile anuas ar a cheann. Bhí an réiteoir sásta gur timpiste a bhí ann agus, cé go raibh captaen na foirne, Johnny Sexton, ag impí air breathnú ar an eachtra arís, ní raibh an réiteoir sásta é a dhéanamh.
Má bhreathnaíonn tú ar an eachtra, feicfidh tú gur rith Baird agus Chamberlain i dtreo na liathróide agus, ag an am céanna, rith Fassi trasna na páirce i dtreo na liathróide freisin. Léim Baird agus Chamberlain (rug Chamberlain ar an liathróid) ach níor léim Fassi. Lean Fassi ar aghaidh ag rith agus thóg sé cosa Baird uaidh agus é san aer. B’in cúis le gortú Baird.
Mar a luaigh mé, dúirt an réiteoir ag an am gur timpiste a bhí ann, go raibh gach aon duine páirteach in iomaíocht don liathróid. Ach ní raibh. Nílim ag rá gur calaois mhailíseach a bhí ann, ach calaois a bhí ann cinnte. Cén cinneadh a bheadh ann dá bhéarfadh Baird ar an liathróid? Greamú san aer, b’fhéidir? An t-aon difríocht idir an dá chinneadh sin ná an liathróid; thóg Fassi cosa Baird uaidh. Tá sé chomh simplí sin.
Tá freagracht ar an réiteoir anseo. Tá dualgas air déanamh cinnte go bhfuil tosaíocht ag sábháilteacht na n-imreoirí. Níor tharla sé anseo. Bhí na céadta imreoirí óga ag an gcluiche agus na mílte eile ag féachaint air sa bhaile. An teachtaireacht a seoladh amach chucu ná gur coimhlint dhleathach a bhí ann, cé gur fhág Baird an pháirc ar shínteán.
Is spórt fisiciúil é rugbaí agus nílim ag rá nach ceart dó a bheith. Is í an fhisiciúlacht ceann de na buanna is mó atá aige mar spórt. Ach caithfidh an fhisiciúlacht sin titim laistigh de dlíthe an spóirt. Ní féidir greamú a dhéanamh ar imreoir san aer agus, má tá imreoir san aer, tá dualgas déanamh cinnte go bhfuil an t-imreoir sin sábháilte. Níor tharla sé anseo.
Dúradh go leor faoi Johnny Sexton freisin agus an bealach cainte a bhí aige i dtreo an réiteora díreach i ndiaidh na heachtra seo. Dúradh go raibh sé míbhéasach agus feargach ina chuid cainte ach cén fáth nach mbeadh sé? Gortaíodh duine dá chomhimreoirí go dona in eachtra nár cheart tarlú agus ní raibh an réiteoir sásta féachaint air.
Caithfidh Sexton na ceisteanna seo a chur agus, nuair a dúirt duine dá chéilithe comhraic leis a chlab a dhúnadh, níor éist sé. Bhí argóint ann, ceann a thosaigh Sexton b’fhéidir, ach ní fhaca a imreoirí tada ach a gcaptaen ag seasamh an fhóid ar a son. Is é Sexton ceannaire na foirne. An mbeadh tú sásta duine nach seasann an fód duit a leanúint? Ní dóigh liom é. Mar a luaigh mé, is spórt fisiciúil é rugbaí. Ní féidir céim siar a thógáil.
Tá súil agam nach bhfeicfimid eachtra ag tarlú an deireadh seachtaine seo ar nós an cheann a tharla Baird ach, má tharlaíonn ceann, tá súil agam go ndéileálfar leis i mbealach níos fearr.
