Tá rabhadh buí fuachta agus oighir eisithe ag Met Éireann don tír ar fad agus an baol ann go mbeidh an teocht cúig chéim faoin reophointe anocht i roinnt contaetha.
Beidh an rabhadh fuachta seo i bhfeidhm óna 9.00pm anocht go dtí a 10.00am maidin amárach.
Tá chuile chosúlacht air nach dtiocfaidh aon mhaolú ar an bhfuacht roimh an Aoine agus go mbeidh an teocht trí chéim faoi bhun an reophointe chuile oíche an tseachtain seo.
A bhuíochas don ardbhrú atá ina mháistir sa tír an tseachtain seo, beidh an aimsir tirim fuar agus roinnt gréine againn. Le titim na hoíche siocfaidh sé agus beidh oighear ar dhromchlaí agus paistí ceo agus ceo seaca ann.
Tá fainic curtha ag Met Éireann ar aon duine a bheidh ag tabhairt faoi aon taisteal go bhféadfadh contúirt a bheith ar bhóithre de bharr an tseaca chrua a fhágfaidh paistí ceo trom in áiteanna agus stráicí bóthair ina reothalach.
Measann Met Éireann gur in iarthar na tíre is measa a bheidh an sioc agus an t-oighear.
Triomach atá á ghealladh dúinn ar fad seachas Cill Mhantáin, Loch Garman, sléibhte Bhaile Átha Cliath agus áiteanna i bPort Láirge mar a bhféadfaí corrcháitheadh sneachta a fheiceáil.
Níor mhór do dhaoine i lár tíre agus sa tuaisceart a bheith ar a n-airdeall amárach mar go bhféadfadh ceo seaca a bheith ina mullach.
Fuar feanntach a bheidh sé anocht, sioc crua forleathan agus paistí leac oighir ar bhóithre is cosáin. Beidh sé tirim ach d’fhéadfadh brat éadrom sneachta titim ar thalamh ard san oirdheisceart agus san oirthear.
Beidh an teocht idir 5 chéim faoin reophointe agus céim amháin os a chionn, leoithne ghaoithe chugainn anoir agus paistí ceo agus ceo seaca in áiteanna.
Sioc is leac oighir a bheidh roimh ár bhformór le gealadh an lae amárach agus brat éadrom sneachta in áiteanna. Lá tirim eile i ndán dúinn seachas corrmhúr fánach leis an gcósta thoir. Beidh an teocht idir dhá chéim agus sé chéim Celsius agus leoithne éadrom nó measartha anoir ann. Le dul faoi na gréine cuirfidh sé sioc arís agus beidh leac oighir fairsing.
Beidh sé an-fhuar anocht agus san oíche amárach ach táthar ag tuar go mbeidh teoide bheag chugainn faoin gCéadaoin nó an Ðéardaoin.
Is amhlaidh an scéal ó oifig na haimsire ar an taobh eile den teorainn agus oíche fhuar fheannaideach á tuar ansin anocht, an teocht ceithre chéim faoin reophointe agus sioc forleathan ar fud an chuid sin d’Ulaidh.
Tá achainí déanta ag Seirbhís Póilíneachta Thuaisceart Éireann ar thiománaithe a bheith fíorchúramach go deo ar bhóithre, go háirithe na bóithre sin nach bhfuil aon ghrean scartha orthu ag na comhairlí áitiúla mar go bhfuil siadsan ina reothalach ag sioc crua.
