Deir Conradh na Gaeilge go bhfuil tréimhse chinniúnach rompu maidir le todhchaí lárionaid na heagraíochta i nGaillimh, Áras na nGael.
Deir an Conradh go bhfuil géarghá le hinfheistíocht “shuntasach” chun an foirgneamh a athfhorbairt chun freastal ar phobal na Gaeilge sa chathair.
Rinneadh cur síos ar an drochbhail atá ar Áras na nGael ag cruinniú de Choiste Gaeilge an Oireachtais a reáchtáladh i nGaillimh.
Dúirt Róisín Ní Chinnéide ó Chonradh na Gaeilge go raibh an tÁras, atá ar Shráid Dominic sa chathair, “ag titim as a chéile”. Dúirt sí gur caitheadh an teach tábhairne san ionad, Club Áras na nGaeilge, a dhúnadh roimh na Nollag mar nach raibh sé sábháilte don phobal.
Dúirt Ní Chinnéide go bhfuil plé ar bun idir bord stiúrtha an Árais agus Roinn na Gaeltachta “ar feadh na mblianta” maidir le hinfheistiú a dhéanamh san ionad ach go raibh an baol ann go mbeadh cúpla bliain eile ann sula ndéanfaí aon socrú.
Thug sí le fios go raibh dul chun cinn déanta leis an Roinn roimhe seo agus go raibh caint ann ar thairiscintí ar obair a fhógairt ach go bhfuil sé sin anois tite as a chéile agus go bhféadfadh obair “cúpla bliain eile” a bheith rompu má chaitear tosú as an nua.
D’fhéadfadh go mbeadh ábhar imní ag an gConradh mar go ndíreofaí maoiniú i dtreo lárionaid nua don Ghaeilge a fhorbairt sa chathair agus go ndéanfaí neamhaird ar Áras na Gaeilge.
Ag an gcruinniú céanna de Choiste Gaeilge an Oireachtais, rinne an eagraíocht Gaillimh le Gaeilge an cás do lárionad Gaeilge nua agus dúirt siad go raibh staidéar féidearthachta faoina leitheid d’fhorbairt curtha i gcrích.
Dúirt Príomhfheidhmeannach Gaillimh le Gaeilge, Bríd Ní Chonghóile, go raibh plean Áras na Gaeilge a athfhorbairt mar lárionad nua luaite sa staidéar atá le cur faoi bhráid bhord stiúrtha Gaillimh le Gaeilge an tseachtain seo chugainn.
Dúirt Ní Chonghóile, áfach, gurb é a rogha féin ná suíomh nua a fháil don lárionad agus go bhféadfaí Áras na Gaeilge agus an lárionad nua araon a fhorbairt chun freastal ar mhuintir na cathrach agus na Gaeltachta sa gceantar. Dúirt sí nach mbeadh Gaillimh le Gaeilge i gceannas ar aon lárionad nua.
Dúirt Róisín Ní Chinnéide gur mian le Conradh na Gaeilge lárionad nua a fheiceáil i gcathair na Gaillimhe chomh maith agus nach cóir gur cinneadh maidir le ceann nó an ceann eile a bheadh i gceist.
“Níl muid ag iarraidh cur i gcoinne lárionaid nua, bheadh sé sin go diail agus sin atá uainn ar fad,” a dúirt Ní Chinnéide ach dúírt sí go raibh an Conradh ag éileamh infheistíochta chun Áras na Gaeilge a chur “ar a sheanléim arís”.
